فرانسيادا 14,5 مىڭ مەملەكەتتىك قىزمەتشى قىسقارتىلماق

استانا. قازاقپارات - فرانسيا ۇكىمەتى مەملەكەتتىك قىزمەتشىلەر اپپاراتىنا اۋقىمدى وڭتايلاندىرۋ جۇرگىزبەك. سونىڭ اياسىندا تاياۋ ەكى جىلدىڭ ىشىندە 14,5 مىڭ جۇمىس ورنىن قىسقارتۋ جوسپارلانۋدا.

بۇل تۋرالى رەسپۋبليكانىڭ پرەمەر-ءمينيسترى ەدۋار فيليپپ Le Journal du Dimanche باسىلىمىنا بەرگەن سۇحباتىندا مالىمدەدى.

«2019-جىلى ءبىز شامامەن 4,5 مىڭ جۇمىس ورنىن قىسقارتۋدى قاراستىرۋدامىز. ال 2020-جىلى بۇل سيفر 10 مىڭنان اسادى»، - دەپ حابارلادى پرەمەر.

فيليپتىڭ اتاپ وتۋىنشە، ونىڭ ۇكىمەتى پرەزيدەنت ەممانيۋەل ماكروننىڭ سايلاۋ الدىندا بەرگەن ۋادەسىنىڭ ءبىرىن وسىلايشا ورىنداماق. ەممانيۋەل ماكرون ءوزىنىڭ سايلاۋ ناۋقانى بارىسىندا 5 جىلدىق پرەزيدەنتتىك مەرزىم ىشىندە (2017-جىلدان باستاپ 2022-جىلعا دەيىن) مەملەكەتتىك اپپارات قۇرىلىمىن وڭتايلاندىرا وتىرىپ، جالپى العاندا 50 مىڭ مەملەكەتتىك قىزمەتشىنى قىسقارتۋ نيەتى تۋرالى مالىمدەگەن بولاتىن.