جەڭىس كۇنى: 13 مىڭنان استام الماتىلىق تولەم الادى

الماتى. قازاقپارات - الماتى قالاسى ءماسليحاتىنىڭ كەزەكتەن تىس III سەسسياسىندا جەڭىستىڭ 78 جىلدىعىنا وراي ءبىرجولعى كومەك كورسەتۋ ماسەلەسىن دەپۋتاتتار ءبىراۋىزدان قولدادى، دەپ حابارلايدى قازاقپارات ءتىلشىسى.

بۇعان دەيىن الماتى قالاسىنىڭ اكىمدىگى ءاربىر ارداگەرگە 1 ميلليون تەڭگە كولەمىندە قاراجات بەرۋدى قاراستىرعان بولاتىن. الايدا، مەگاپوليس باسشىسى ەربولات دوسايەۆتىڭ ۇسىنىسى بويىنشا بيىل الماتىداعى 58 سوعىس ارداگەرى 1,5 ميلليون تەڭگە كولەمىندە اقشالاي تولەم الاتىن بولدى.

سونداي-اق، الماتىنىڭ 13233 تۇرعىنىنا مەرەكەگە وراي 889,9 ميلليون تەڭگەگە اقشالاي تولەم قاراستىرىلىپ وتىر. بۇل - ەكىنشى دۇنيەجۇزىلىك سوعىسىنىڭ قاتىسۋشىلارى مەن مۇگەدەكتەرىنە تەڭەستىرىلگەن ازاماتتار، ەڭبەك مايدانىنىڭ قاتىسۋشىلارى، باسقا مەملەكەتتەردىڭ اۋماعىنداعى سوعىس ارداگەرلەرى، سوعىستا قايتىس بولعان قاتىسۋشىلارى مەن مۇگەدەكتەرىنىڭ ايەلدەرى، اۋعانستاندا جانە باسقا مەملەكەتتە قازا تاپقانداردىڭ وتباسىلارى.

- ۇ و س قاتىسۋشىلارى مەن مۇگەدەكتەرىنە 1,5 ميلليون تەڭگەدەن

- ۇ و س قاتىسۋشىلارىنا تەڭەستىرىلگەندەرگە 100 مىڭ تەڭگەدەن

- ەڭبەك مايدانىنا قاتىسۋشىلارعا 50 مىڭ تەڭگەدەن

- باسقا مەملەكەتتەر اۋماعىنداعى سوعىس قيمىلدارىنىڭ ارداگەرلەرىنە 100 مىڭ تەڭگەدەن

- ۇ و س- دا قايتىس بولعان قاتىسۋشىلاردىڭ، مۇگەدەكتەردىڭ ايەلدەرىنە 50 مىڭ تەڭگەدەن

- اۋعانستاندا جانە باسقا مەملەكەتتەردە قازا تاپقانداردىڭ وتباسىلارىنا 100 مىڭ تەڭگەدەن.

ءوز كەزەگىندە، دەپۋتاتتار ارداگەرلەردى قۇتتىقتاۋعا جانە ولارعا قوسىمشا كومەك كورسەتۋگە قاتىساتىنىن جەتكىزدى.