قازترانسويل 13 ميلليارد تەڭگەگە تەندەر وتكىزۋ كەزىندە باسى ارتىق تالاپتار قويعان

استانا. قازاقپارات - باس كولىك پروكۋراتۋراسى «قازترانسويل» ا ق قىزمەتىندە الەۋەتتى ءونىم بەرۋشىلەرگە ارتىق بىلىكتىلىك تالاپتارىن قويۋ ارقىلى جاساندى شەكتەۋ فاكتىلەرىن انىقتادى، دەپ حابارلايدى قازاقپارات.

مىسالى، قوعام اشىق كونكۋرس تاسىلىمەن اۆتوكولىك قۇرالدارىن جالعا الۋ قىزمەتىن جالپى سوماسى 12,8 ميلليارد تەڭگەگە ساتىپ الۋدى جوسپارلاعان.

وسىعان قاراماستان اۆتوموبيلدەردى جالعا الۋ ءۇشىن قاجەت ەتپەيتىن «جول ينسپەكتورى/تەحنيك/ينجەنەر- مەحانيك» ماماندىعى بويىنشا ديپلومدار بولۋى شارت رەتىندە قويىلعان.

ۇلتتىق وپەراتوردىڭ اكىمشىلىك عيماراتىن كۇتىپ ۇستاۋ جونىندەگى قىزمەتتەردى 460 ميلليون تەڭگەگە ساتىپ الۋ كەزىندە دە وسىنداي جاعداي بولدى.

تەندەرلىك قۇجاتتاما بويىنشا كاسىپكەر كۇزەت قىزمەتى بويىنشا ليتسەنزيانىڭ، سونداي- اق قالدىقتاردى سۇرىپتاۋ مەن جويۋ بويىنشا رۇقسات قۇجاتتاردىڭ بار ەكەنىن راستاۋعا ءتيىس بولعان.

پروكۋراتۋرا اكتىسى بويىنشا جوعارىدا اتالعان تەندەرلەر ادال باسەكەلەستىك قاعيداتتارىنىڭ بۇزىلۋىنا بايلانىستى جويىلدى.