اتىراۋ وبلىسىنداعى ات بايگەسىندە 13 جاسار شاباندوز باس جۇلدەگە يە بولدى
ماحامبەت اۋدانىنداعى كەڭورىس اۋىلىندا كونستيتۋتسيا كۇنىنە وراي قازاقتىڭ ۇلتتىق ويىندارىنان بايگە ءوتتى. وبلىستىق اكىمدىكتىڭ قولداۋىمەن وتكەن ۇلتتىق ويىندارعا كوماندالىق كوكپار، قىز قۋۋ، الامان جانە قۇنان بايگە كىردى.
قۇنان بايگەنىڭ قاشىقتىعى - 12 شاقىرىم. مارە سىزىعىن 19 شاباندوزدىڭ اراسىنان 13 جاسار ساعىندىق الدانبايدىڭ جۇيرىگى ءبىرىنشى بولىپ كەستى.
ءجاسوسپىرىم شاباندوز جىلىوي اۋدانىنىڭ قوسشاعىل اۋىلىندا تۇرادى. بايگەگە ات قوسقانىنا ەكى جىل بولعان. جۇيرىگىنىڭ اتى - بايان.
«بىلتىر جىلىوي اۋدانىندا وتكەن «التىن تاي» بايگەسىندە جەڭىمپاز اتاندىق. مەنى شاباندوزدىققا اعايىم جاستالاپ تاڭقايەۆ باۋلىدى»، - دەيدى شاباندوز بالا ساعىندىق الدانباي.
قۇنان بايگەنىڭ باس جۇلدەگەرى ساعىندىق الدانبايعا 500 مىڭ تەڭگە بەرىلدى. ال، ەكىنشى جۇلدەنى جاڭاوزەن قالاسىنان قاتىسقان شاباندوز تاڭاتار ءسۇيسىنوۆ، ءۇشىنشى ورىندى باتىس قازاقستان وبلىسىنىڭ تۇرعىنى اسحات كامەشيەۆ يەلەندى.
ۇلتتىق ويىنداردىڭ تاعى ءبىرى - قىز قۋۋ. بۇل سايىسقا اتىراۋ وبلىسىنىىڭ ءار اۋدانىنان بەس ارۋ قاتىستى. ولار - داريا ەربول، نۇرشات ءاليحان، فاتيما ورىنعالي، قىمبات اسىلحان، ساۋلە اسانكەلدى.
«ءبىزدىڭ بىرنەشە تۇلپارىمىز بار. قىز قۋۋعا العاش رەت قاتىستىم»، - دەيدى داريا ەربول.
ەرەجەگە سايكەس، جىگىت قىزدى قۋىپ جەتىپ، بەلبەۋىنەن شارفتى جۇلىپ الۋى كەرەك. بۇل جولى ات ۇستىندەگى ارۋلاردىڭ جولى بولدى. ارۋلار مىنگەن تۇلپارلارعا جىگىتتەردىڭ جۇيرىگى جەتە العان جوق.
ەسكە سالا كەتەلىك، بۇدان بۇرىن اتىراۋلىق شەبەر نۇرلىبەك بيسەمبايەۆ ايىنا 100 دومبىرا جاسايتىنىن حابارلاعان بولاتىنبىز.
