قاڭتار وقيعاسىندا قازا بولعان 13 ادامنىڭ تۋىستارىنا قوردان قاراجات اۋدارىلادى

نۇر-سۇلتان. قازاقپارات - قاڭتار وقيعاسىندا جازاتايىم قازا بولعانداردىڭ تۋىستارىنا قاراجات ءبولىندى.

بۇل تۋرالى «قازاقستان حالقىنا» قوعامدىق قورى ءتوراعاسىنىڭ ورىنباسارى ءلاززات شىڭعىسبايەۆا ايتتى، دەپ حابارلايدى قازاقپارات ءتىلشىسى.

«بۇگىنگى تاڭدا قازا تاپقان 19 جانە اۋىر جارالانعان 106 ىشكى ىستەر مينيسترلىگى، ۇلتتىق قاۋىپسىزدىك كوميتەتى قىزمەتكەرلەرىنىڭ وتباسى مۇشەلەرىنە جانە قورعانىس مينيسترلىگى مەن رەسپۋبليكالىق ۇلاننىڭ اسكەري قىزمەتشىلەرىنە ماتەريالدىق كومەك كورسەتىلدى. جالپى سوما 451 ميلليون تەڭگەنى قۇرادى»، - دەدى ل. شىڭعىسبايەۆا ورتالىق كوممۋنيكاتسيالار قىزمەتىندە.

سونىمەن قاتار ول قاڭتار وقيعاسىندا جازاتايىم قازا بولعانداردىڭ تۋىستارىنا قاراجات بولىنگەنىن ايتتى.

قازا بولعان ءۇش ازاماتتىڭ وتباسى مۇشەلەرىنە اقشالاي تولەمدەر جىبەرىلدى، ولاردىڭ جازاتايىم وقيعانىڭ قۇربانى ەكەنىن قۇزىرلى ورگان راستادى. سونداي-اق زارداپ شەككەن ءۇش بالانىڭ جانە قايتىس بولعان ەكى بالانىڭ وتباسىلارىنا اقشالاي تولەمدەر جىبەرىلدى. بۇل ساناتتاعى جاپا شەككەندەرگە تولەنگەن جالپى تولەم سوماسى 44 ميلليون تەڭگەنى قۇرادى»، - دەدى قور وكىلى.

ونىڭ ايتۋىنشا، قازىر قازا تاپقان 13 بەيبىت تۇرعىننىڭ تۋىستارىنا اقشا اۋدارۋ ءۇشىن اقپاراتتار ناقتىلانىپ جاتىر.

تاراتىلعان مالىمەتكە قاراعاندا، ءۇش ايدا «قازاقستان حالقىنا» قوعامدىق قورىنا 126,05 ميلليارد قارجى ءتۇستى.