وسكەمەندە جوعالىپ كەتكەن 13 جاستاعى جەتكىنشەك تابىلدى

وسكەمەن. قازاقپارات - وسكەمەن قالاسىندا جوعالىپ كەتكەن 13 جاستاعى قىز تابىلدى، دەپ حابارلايدى قازاقپارات ءتىلشىسى.

قالالىق پوليتسيا باسقارماسى باسپا ءسوز قىزمەتىنىڭ مالىمەتىنە سۇيەنسەك، 13- اقپاندا ساعات 19.00 شاماسىندا «102» جەدەل ارناسىنا حابارلاسقان ەر ادام كامەلەتتىك جاسقا تولماعان قىزىنىڭ جوعالىپ كەتكەنىن ايتتى.

ءوز سوزىندە ول ءتۇس كەزىندە اپايىنىڭ ۇيىنەن شىققان بالاسىنىڭ سول كۇيى حابار-وشارسىز ەكەنىن جەتكىزدى.

ەرتىس پوليتسيا ءبولىمىنىڭ جەكە قۇرامى شۇعىل تۇردە 13 جاستاعى جەتكىنشەكتى ىزدەۋگە كىرىستى.

«ىزدەستىرۋ جۇمىستارىنا كامەلەتكە تولماعاندار جونىندەگى ينسپەكتورلار دا جۇمىلدىرىلدى. قىز بارۋى مۇمكىن دەگەن جەرلەر تۇگەل تەكسەرىلدى. ايتەۋىر ءتۇن ورتاسىندا جەتكىنشەك امان-ەسەن تابىلدى»، - دەدى باسقارما باستىعى اندرەي مۋلا.

ونىڭ ايتۋىنشا، قىز ءوزىنىڭ تانىسىمەن كۇنى بويى قالانى ارالاپ، سونىڭ ۇيىنە بارا جاتقاندا تابىلعان.