10:29, 14 - مامىر 2019 | GMT +5
ءۇش ايدا 13 ميلليارد دوللاردىڭ تاۋارى ەكسپورتتالدى - مينيستر دالەنوۆ
نۇر- سۇلتان. قازاقپارات - قازاقستان ءۇش ايدا 13 ميلليارد دوللاردىڭ تاۋارىن ەكسپورتتادى. بۇل تۋرالى بۇگىن ۇكىمەت وتىرىسىندا ەل ەكونوميكاسىنىڭ 1- توقسانداعى الەۋمەتتىك- ەكونوميكالىق دامۋى جايىندا بايانداعان ق ر ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.
«وسى جىلعى قاڭتار- ناۋرىزدا سىرتقى ساۋدا اينالىمى 20,4 ميلليارد دوللاردى قۇرادى. ەكسپورت كولەمى 13,3 ميلليارد دوللار بولدى»، - دەدى ر. دالەنوۆ.
ونىڭ ايتۋىنشا، مۇناي مەن مەتالداردى قوسپاعاندا ەكسپورتتىق جەتكىزىلىمدەردىڭ ءوسىمى 19,8 پايىزعا جەتكەن.
«يمپورت 2,7 پايىزعا تومەندەي وتىرىپ، 7 ميلليارد دوللاردى قۇرادى»، - دەدى ول.
اۆتور: مارلان جيەمباي