قازاقستاندا ۇلتتىق فيلمدەردىڭ ۇلەسى 13 پايىزعا ارتتى
جيىن بارىسىندا قازاقستان كينو نارىعىنىڭ نارىعىنىڭ كولەمى تۋرالى ستاتيستيكا ايتىلدى.
«قازاقستاندا وتكەن جىلى 355 كينوزالدا 200 شەتەلدىك، 26 ۇلتتىق فيلم كورسەتىلگەن. سونىڭ ىشىندە كاسسا جيناعى بويىنشا ءتۇسىمنىڭ 80 پايىزىن گولليۆۋد كينولارى السا، 13 پايىزىن ۇلتتىق فيلمدەر العان. 7 پايىزى رەسەيلىك فيلمدەردىڭ ۇلەسىندە. جالپى قازاقستانداعى كينو نارىعىنىڭ كولەمى 44,5 ميلليون دوللار»، - دەدى رەسەيلىك ساراپشى ولەگ گولوۆاشكين.
ونىڭ ايتۋىنشا، بىلتىر ۇلتتىق كينونىڭ الاتىن ۇلەسى نەبارى %6 بولعان.
قازاق كينولارىنىڭ ىشىندە نۇرلان قويانبايەۆ تۇسىرگەن «بيزنەس پو- كازاحسكي ۆ امەريكە» كينوسى قازاقستاندا كاسسا جيناعى بويىنشا 1 ميلليون 750 مىڭ ا ق ش دوللارىمەن 3-ورىنعا تۇراقتادى.
جيىن بارىسىندا كينو سالاسىنىڭ ماماندارى، بەلگىلى رەجيسسەرلەر، اكتەرلەر، پروديۋسەرلەر ءوز پىكىرلەرىن جەتكىزدى.
«زاڭ جوباسى جوق كەزدە دە جاقسى كينو تۇسىرگەنبىز. ءبىراق ەندى فيلمدەرىمىز ودان دا جاقسى بولادى دەپ سەنەمىن»، - دەدى ءاسانالى ءاشىموۆ.
ءوز كەزەگىندە دراماتۋرگ دۋلات يسابەكوۆ ۇلتتىق قوردى شەتەلدىك كينولارعا بيلەتكە قوسىمشا قۇن قوسۋ ارقىلى كوتەرۋگە قارسىلىعىن ءبىلدىردى.
«تۇنگى ساعات 22.00-06.00 ارالىعىندا قازاق كينولارعا باراتىن ءتۇرىمىز بار. سوسىن ۇلتتىق كينو دەگەن انىقتامانى كىم بەرەدى؟ شەتەلدەن كەلگەن كينولارعا قوسىمشا سالىق تاعى مەنىڭ قالتاما تۇسەيىن دەپ تۇر. كورەرمەن اقشا تولەيدى. قوردى ساقتاپ قالۋ ءۇشىن»، - دەدى دۋلات يسابەكوۆ.
بەلگىلى جازۋشى، دراماتۋرگ سماعۇل ەلۋباي قازىرگى تاڭدا قازاق كينوسىنىڭ دۋبلياجى ءتۇسىپ كەتكەنىن ايتتى.
«بۇرىن قازاق ءتىلى ەشكىمگە كەرەك ەمەس كەڭەس وداعى كەزىندە جىلىنا 60 كينو دۋبلياجدالاتىن. قازىر كەرىسىنشە تاۋەلسىزدىك العان كەزدە قازاق تىلىندەگى كينولار كوپ ءتۇسىرىلۋى ءتيىس، كوپ دۋبلياجدالۋى ءتيىس ەمەس پە؟ ال كينوتەاترلار قازىر تيىن ساناپ وتىر. ولارعا تيىن تۇسەتىن گولليۆۋد كينولارى كەرەك. سوندىقتان بۇل جەردە وسى ماسەلەنى دە رەتتەيتىن تەتىك كەرەك»، - دەدى سماعۇل ەلۋباي.
ال رەجيسسەر ساتىبالدى نارىمبەتوۆ بۇگىنگى قازاق كينوسىنىڭ اۋديتورياسىن ءۇش ساناتقا ءبولدى.
«قازىر ءبىرىنشى كەزەكتە تۇسىرىلگەن كينو قارجىسىن قايتارۋ كەرەك دەگەن قاعيدا تۇرادى. بۇل جەردە يدەولوگيا مەن كوممەرتسيانى شاتاستىرماۋ كەرەك. يدەولوگيا ۇلت رەتىندەگى بىرەگەيلىگىمىزدى ساقتاپ قالاتىن ماڭىزدى باعىت. يدەولوگيانىڭ بارلىعى كوممەرتسيالىق بولماۋى كەرەك. قازىرگى اۋديتوريا ءۇش ءتۇرلى كينو كورەدى. جۇمىستان شارشاپ كەلگەندەر كەلىنكا ءسابينانى كورىپ، سترەسسىن الادى. ال جاستار ارتقى ورىندىققا وتىرىپ الىپ بويەۆيك كورگەندى ۇناتادى. قالعاندارى عانا ۇلتتىق كينونى كورەدى»- ، دەدى ساتىبالدى نارىمبەتوۆ.
«ەلباسى تاپسىرماسى بويىنشا قازاق كينەماتوگرافياسى تۋرالى زاڭ جوباسى وتكەن جىلى قاراشادا ماجىلىسكە بەرىلگەن بولاتىن. 26 - جەلتوقساندا وزگەرىستەر مەن تولىقتىرۋلار ەنگىزۋ تۋرالى زاڭ جوباسىنىڭ تۇساۋى كەسىلدى. زامان تالابىنا ساي ۇلتتىق فيلمدەردىڭ ساپاسىن ارتتىرۋ ماسەلەسى كۇن تارتىبىنە قويىلدى. ءبىزدىڭ كينەماتوگرافيا سالاسىن الەم مويىنداۋى ءۇشىن دەربەس زاڭ قابىلداۋ قاجەت. قولدانىستاعى «مادەنيەت تۋرالى زاڭدا كينو سالاسىنا تەك 6- باپ قانا كوزدەلگەن. جاڭا زاڭ جوباسى بويىنشا ۇلتتىق كينونى قولداۋ مەملەكەتتىك قورىن قۇرۋ، قازاق كينوسىن تۇسىرەتىندەرگە سالىقتىق جەڭىلدىكتەر قاراستىرۋ، پروكاتتا اينالاتىن فيلمدەردىڭ سانى مەن ەسەبىن جۇرگىزەتىن ءبىرىڭعاي جۇيە قۇرۋ ۇسىنىلادى»، - دەدى ءماجىلىس دەپۋتاتى بەيبىت مامىرايەۆ.
ايتا كەتۋ كەرەك، ساراپشىلاردىڭ تالقىلاۋى ەرتەڭ دە جالعاسىن تابادى.
اۆتور: گۇلميرا عوسمانالي
