سپورتتىق ساپارىمدى بەس جاسىمدا باستادىم - 13 جاستاعى الەم چەمپيونى
دەپ حابارلايدى «قازاقپارات» ح ا ا ءتىلشىسى.
ون ۇشىندە وتانىنىڭ ايبىنىن اسقاقتاعان ازامات جالپى قۇراماداعى 12 التىن مەدالدىڭ ءبىرىن قازاقستاننىڭ قورجىنىنا سالىپ وتىر.
ءالى بالا بولسا دا ەلى ءۇشىن قۋانىشتىڭ - جەڭىسى دارا. سوزگە شورقاق، ىسكە شەبەر جاس چەمپيون بولاشاعىنان ۇلكەن ءۇمىت كۇتتىرەدى. تاراز قالاسىنداعى №36 مەكتەپتىڭ 8 - سىنىپ وقۋشىسى كۇنى كەشە عانا قازاقستان چەمپيوناتىن ۇتىپ، بۇكىل تارازدىقتاردىڭ ماقتانىشىنا اينالعان ەدى. ەندى بۇگىن «بولام» دەگەن جىگىت الەمدىك تۇعىرعا كوتەرىلدى.
«2004 -جىلى تاراز قالاسىندا دۇنيەگە كەلدىم. كيوكۋشينكاي- كان كاراتەگە بەس جاسىمنان باستاپ قاتىسىپ ءجۇرمىن. بالا كەزدە شەتەلدىك فيلمدەردى كورىپ، ايقاس كەزىندە سولارداي مىقتى بولسام دەپ ارماندايتىن ەدىم. قيالىمنىڭ ورىندالا باستاعانىن كاراتە زالىنداعى جاتتىعۋ كەزدەرىندە سەزىنە باستادىم. شپاگاتتا وتىرۋ، ايقاستىڭ ايلالى امالدارىن اياق سوققىسى ارقىلى ۇيرەنۋ مەنى قاناتتاندىرا ءتۇستى»، - دەيدى قۋانىش داتقا.
بالا دەگەنىڭىزبەن، قۋانىشتىڭ تانىم- تۇسىنىگى شىڭدالىپ قالعان ويلى جاس ەكەنىن اڭگىمە بارىسىندا اڭعارا تۇستىك. البەتتە، الەم چەمپيونى بولۋ ءۇشىن تەمىردەي تارتىپكە نەگىزدەلگەن جاتتىعۋ كەرەك. وسى تارتىپكە كوندىگىپ، باپكەردىڭ ايتقانىن بۇلجىتپايتىن جاس سپورتشى بۇدان بۇرىن دا بيىك بەلەستەردى باعىندىرعان ەكەن.
«ودەسسادا وتكەن الەم چەمپيوناتىنان بۇرىن ەۋروپا چەمپيوناتىنا بارعان ەدىك. ول كەزدە ءبىر عانا قارسىلاسقا ەسە جىبەرىپ، ءۇشىنشى ورىن العان بولاتىنمىن. بۇل جولى ءبىرىنشى ورىنعا قول جەتكىزدىك. 12-13 جاس ارالىعىنداعى 40 كەلىگە دەيىنگى سالماقتا چەمپيوناتتا ونەر كورسەتۋ وڭاي بولعان جوق»، - دەيدى ول.
قۋانىش چەمپيوناتتىڭ اقتىق سايىسىندا ۋكراينانىڭ سپورتشىسىمەن شىعىپتى. وعان دەيىن رەسەي ەلىنەن كەلگەن قارسىلاسىن تىزە بۇكتىرگەن. ۋكراينا - «كىلەم يەسى» بولعاندىقتان، قۋانىشتىڭ باپكەرى «بۇرا تارتۋ بولا ما؟» دەپ كۇدىكتەنگەن كورىنەدى. الايدا شاكىرتىنىڭ ابجىلدىگى مەن اسقان شەبەرلىگى كىلەمگە شىققان كەزدە- اق باپكەرىنىڭ كۇمانىن جوققا اينالدىرىپتى.
جاس چەمپيوننىڭ كۇندەلىكتى ومىرىندە ارتىق ۋاقىتى جوق. تۇسكە دەيىن ساباققا بارىپ كەلگەن سوڭ كۇندەلىكتى جاتتىعۋى باستالادى. ساعات 16.00-19.00 ارالىعىنداعى تىنىمسىز جاتتىعۋدىڭ، توككەن تەردىڭ تەككە كەتپەگەنىن قۋانىش بۇگىن جۇلدەسىمەن دالەلدەپ وتىر. باپكەر جاسقايرات شەرەنوۆتىڭ چەمپيون تۇلەگى كەلەشەكتەگى وي- ماقساتى - بىرنەشە دۇركىن الەم چەمپيونى بولۋ ەكەن.
ەسكە سالا كەتسەك، ۋكراينانىڭ ودەسسا قالاسىنان «التىنعا تولى» قورجىنمەن ورالعان ساڭلاقتارىمىزدىڭ باسىن ۇلتتىق رەسپۋبليكالىق كيوكۋشينكاي- كان كاراتە فەدەراتسياسى بۇگىن استاناداعى «سارىارقا» ۆەلوترەگىندە قوسقان بولاتىن. قازاق سپورتشىلارى اتالعان دودادان 12 التىن، 4 كۇمىس پەن 1 قولا مەدال الىپ كەلىپ وتىر. فەدەراتسيا پرەزيدەنتى ومارحان وكسىكبايەۆتىڭ ايتۋىنشا، قازاقستان سپورتشىلارى بۇرىن سوڭدى كيوكۋشينكاي- كان كاراتەدەن الەم چەمپيوناتىندا مۇنداي زور جەتىستىككە قول جەتكىزبەگەن.
اۆتور: ايان بەكەن ۇلى
