الماتى وبلىسىنىڭ 13 جاسار تۇرعىنى ەرلىگى ءۇشىن ماراپاتتالدى - فوتو

تالدىقورعان. قازاقپارات - ەسىك قالاسىنداعى 2№-ورتا مەكتەبىنىڭ 7- سىنىپ وقۋشىسى الەكسەي چەبانيك «توتەنشە جاعدايداعى ەرلىگى ءۇشىن» توسبەلگىسىمەن ماراپاتتالدى، دەپ حابارلايدى قازاقپارات ءتىلشىسى.

سونداي-اق ەسىك قالاسىندا تۇراتىن ا. بلۋحوۆ، ن. كوزلوۆ پەن س. گۋسيەۆ توتەنشە جاعدايلار كوميتەتىنىڭ العىس حاتتارىن الدى. وسى ازاماتتاردىڭ ءبارى ورىس، سلاۆيان جانە كازاك ۇيىمدارى قاۋىمداستىعىنىڭ مۇشەلەرى.

بۇل ماراپاتتار ولارعا 2017-جىلدىڭ 18- ماۋسىمىندا بولعان توتەنشە جاعدايدا ەرلىك پەن تاپقىرلىعى ءۇشىن بەرىلىپ وتىر. ازاماتتار شۇڭقىرعا ءتۇسىپ كەتكەن 5 جاسار قىزدى قۇتقاردى. ولار 13 جاسار الەكسەي چەبانيكتى ارقانعا بايلاپ، شۇڭقىرعا تۇسىرگەن. جاس ءوسپىرىم كىشكەنتاي قىزدى جوعارىعا شىعارادى. دەرەۋ جەرگىلىكتى اۋرۋحانانىڭ جانساقتاۋ بولىمىنە جەتكىزىلگەن ءبۇلدىرشىن ءولىم اۋزىنان امان قالدى. قازىر كىشكەنتاي قىزدىڭ دەنساۋلىعى تۇراقتى.