الماتى مارافونىنىڭ جاس جەڭىمپازى بولىپ 13 جاستاعى قىز اتاندى

الماتى. قازاقپارات - وڭتۇستىك استانادا ءوتىپ جاتقان الماتى مارافونىندا ەڭ جاس قاتىسۋشىلار اراسىنداعى جەڭىمپازدار بەلگىلى بولدى.

3 شاقىرىمدىق قاشىقتىقتا بولعان جارىستا 10-14 جاس ارالىعىنداعى قاتىسۋشىلاردىڭ ىشىنەن 13 جاستاعى ەكاتەرينا سۋريكوۆا جەڭىمپاز اتاندى.

«مەن بۇل الماتى مارافونىنا ەكىنشى رەت قاتىسىپ وتىرمىن. وتكەن جىلى وسى قاشىقتىق بويىنشا التىنشى ورىنعا يە بولىپ ەدىم. ەندى، كەلەسى جىلى وسى مارافوندا 10 شاقىرىمدىق قاشىقتىققا جۇگىرۋدى الدىما ماقسات ەتىپ قويدىم»، - دەدى ە. سۋريكوۆا.

كاتيانىڭ ايتۋىنشا، ونىڭ جەڭىل اتلەتيكامەن اينالىسقانىنا بىرنەشە جىل بولعان.

«سپورت ادامداردى بىرىكتىرە تۇسەدى، جاڭا دوستار تابۋعا سەپتىگىن تيگىزەدى. ءارى شىنىعاسىڭ. سوندىقتان، قۇربىلارىمدى سالاماتتى ءومىر سالتىن ۇستانۋعا شاقىرامىن»، - دەدى جاس سپورتشى.

ال وسى جاس كاتەگورياسى بويىنشا ۇلدار اراسىندا كولۋمبيادان كەلگەن ءجاسوسپىرىم سپورتشى گارسيا سەباستيان جەڭىمپاز اتاندى.

اۆتور: ايبوتا جاپپاربەرگەن