استانادا 13- ەۋرازيا مەديا فورۋمى باستالدى
اتاپ ايتقاندا، بيىل قازاقستانعا الەمنىڭ 50 ەلىنەن 30 سپيكەر مەن 400 دەلەگات كەلدى. سونىمەن قاتار بۇقارالىق اقپارات قۇرالدارىنىڭ 400 دەن استام وكىلى فورۋمنان حابار تاراتادى.
فورۋم بارىسىندا بۇگىن نەگىزگى 4 ءماجىلىس وتەدى، سونداي-اق بەلگىلى جۋرناليستەر، ساياساتكەرلەر مەن ەكونوميستەر 5 شەبەرلىك ساباعىن وتكىزەدى.
شارانىڭ بۇگىنگى كۇن تارتىبىندە عالامدىق داعدارىس، مۇناي ءوندىرۋ سالاسىنداعى پروبلەمالار، تاياۋ شىعىستاعى احۋال، اۋعانستان ماسەلەسى، ХХІ عاسىرداعى اقپارات سوعىسىنىڭ ەرەكشەلىكتەرى، مەملەكەتتىك قارجى رەسۋرستارىن باسقارۋ تاقىرىپتارى تالقىلانادى.
فورۋمعا ق ر قاۋىپسىزدىك كەڭەسىنىڭ حاتشىسى نۇرلان ەرمەكبايەۆ، اۋعانستاننىڭ بۇرىنعى پرەزيدەنتى حاميد كارزاي، ۇلى بريتانيالىق ەكونوميست سايمون انحولت، ق ر سىرتقى ىستەر ءمينيسترى ەرلان ىدىرىسوۆ، ۇلى بريتانيانىڭ بۇرىنعى سىرتقى ىستەر ءمينيسترى دجەك سترو، ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى ەرلان قارين جانە باسقا دا بەلگىلى ساياساتكەرلەر مەن ساراپشىلار قاتىسادى دەپ كۇتىلۋدە.
ايتا كەتەيىك، ە ا م ف 2002-جىلى داريعا نازاربايەۆانىڭ باستاماسىمەن بەيساياسي ءارى كوممەرتسيالىق ەمەس ۇيىم رەتىندە قۇرىلدى. فورۋم باتىس پەن شىعىستى تولعاندىراتىن كوكەيكەستى ماسەلەلەردى اشىق تالقىلاۋعا باعىتتالعان.
اۆتور: رۋسلان عابباسوۆ
