قازاقستان الداعى ۋاقىتتا 13 مەملەكەتپەن رەادميسسيا تۋرالى كەلىسىم جاسايدى

استانا. قازاقپارات - بۇگىن پارلامەنت سەناتى كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ ۇكىمەتى مەن گەرمانيا فەدەراتيۆتىك رەسپۋبليكاسىنىڭ ۇكىمەتى اراسىنداعى ادامداردى قابىلداۋ جانە ترانزيتتەۋ تۋرالى كەلىسىمدى (رەادميسسيا تۋرالى كەلىسىم) راتيفيكاتسيالاۋ تۋرالى» زاڭ جوباسىن ماقۇلدادى.

اتالعان كەلىسىم 2009-جىلدىڭ جەلتوقسان ايىندا بەرليندە جاسالىپ، وعان قازاقستان مەن گەرمانيانىڭ سىرتقى ىستەر مينيسترلەرى قول قويعان.

زاڭ جوباسى قازاقستان مەن گەرمانيا ەلدەرىنىڭ اۋماعىنا كىرۋ جانە وندا بولۋ شارتتارىن بۇزعان ادامداردى انىقتاۋدى جانە قايتارۋدى كوزدەيدى. بۇل ساناتقا ەلىمىزدىڭ اۋماعىنا زاڭسىز كىرگەن نەمەسە زاڭدى كىرگەن، ءبىراق ۆيزانىڭ رۇقسات مەرزىمى ءوتىپ كەتكەننەن كەيىن سوندا قالعان ادامدار جاتادى. تۇتاستاي العاندا، كەلىسىم زاڭسىز كوشى-قونمەن كۇرەسۋگە مۇمكىندىك بەرەدى. بۇدان بولەك، ەلدىڭ اۋماعىندا زاڭسىز جۇرگەن ادامداردى حالىقارالىق قۇقىققا سايكەس قابىلداۋدى، سونداي-اق ولاردىڭ ترانزيتىن جەڭىلدەتەدى.

ىشكى ىستەر ۆيتسە-مينيسترى ۆلاديمير بوجكونىڭ ايتۋىنشا، بۇگىنگى تاڭدا قازاقستان تاراپىنان الەمنىڭ 12 ەلىمەن رەادميسسيا تۋرالى كەلىسىم جاسالعان. ولاردىڭ اراسىندا گەرمانيا، شۆەيتساريا، چەح، لاتۆيا، ليتۆا، رەسەي، وزبەكستان، نورۆەگيا، بەلارۋس، ۆەنگريا، بەنيليۋكس مەملەكەتتەرى جانە مولدوۆا بار. «قازىرگى تاڭدا جاقىن جانە الىس شەت ەلدەرمەن رەادميسسيا تۋرالى 13 كەلىسىمشارت ازىرلەنۋ ۇستىندە. بۇل قۇجاتتار مەملەكەتتىك ورگاندار اراسىنداعى كەلىسىمدەر ساتىسىندا تۇر»، - دەدى ۆ. بوجكو.

زاڭ جوباسى پالاتانىڭ الداعى جالپى وتىرىسىنا شىعارىلاتىن بولادى.

اۆتور: قانات مامەتقازى ۇلى