اتىراۋلىق 13 جاستاعى جىگىت الەمدىك ءۇش رەكورد ورناتتى

استانا. قازاقپارات - اتىراۋلىق 13 جاستاعى كيريلل ليتۆينوۆ پەن 27 جاستاعى ەدۋارد قابدەشيەۆ پورتۋگاليادا وتكەن پاۋەرليفتينگتەن الەم چەمپيوناتىندا قازاقستان قۇراماسى ساپىندا بىرنەشە التىن جانە ءبىر كۇمىس مەدال يەلەندى، - دەپ جازادى «اق جايىق».

كيريلل ءۇشىن بۇل الەمدىك ارەناداعى دەبيۋت. جاس سپورتشى 13-15 جاس دارەجەسى بويىنشا بىرنەشە اتالىمدا الەم چەمپيونى اتاندى (سالماق دارەجەسى 52 كەلىگە دەيىن). سونىمەن قاتار، كيريلل زىلتەمىردى جاتىپ كوتەرۋدەن (72,5 كەلى)، زىلتەمىردى تىزەگە دەيىن كوتەرۋدەن (145 كەلى) جانە كۇشتىك ءۇشسايىستان الەم رەكوردىن ورناتتى.

«وتكەن جىلى اكەم ەدۋاردپەن بىرگە ا ق ش- تا بولعان چەمپيوناتتان كەلگەندە سۋرەتتەرىن كوردىم، وسىدان كەيىن جاتتىعۋ جاساپ، ءوزىم دە وسىنداي نەگە بولمايمىن دەپ ويلادىم. اكەمە ايتىپ، ءبىز مىقتاپ دايىندالا باستادىق»، - دەيدى جاس چەمپيون.

ەدۋارد 110 كەلىگە دەيىن سالماقتا ونەر كورسەتتى. «ول باستى قارسىلاسىمەن بىردەي ناتيجە كورسەتكەن، الايدا ونىڭ سالماعى 107,4 كەلى، قارسىلاسىنىكى 107 كەلى بولعاندىقتان، سپورتشىمىز ەكىنشى ورىن الدى»، - دەدى باپكەر الەكساندر ليتۆينوۆ.

باسىلىمنىڭ حابارلاۋىنشا، چەمپيوناتقا 36 ەلدەن 400 دەن اسا اتلەت قاتىستى. قازاقستان نامىسىن 46 سپورتشى قورعادى. جالپىكوماندالىق ەسەپتە قازاقستان ءبىرىنشى ورىن الدى.

پاۋەرليفتينگ ءۇش جاتتىعۋدان تۇرادى: زىلتەمىردى يىققا قويىپ، وتىرىپ-تۇرۋ، زىلتەمىردى جاتىپ كوتەرۋ جانە زىلتەمىردى تىزەگە دەيىن كوتەرىپ تۇرۋ.

 ​Baq.kz