قازاقستاندا نارەستەلەر ءولىمى 13 پايىزعا ازايدى
2014 - جىلى 11 ايدىڭ ىشىندە ءتىرى تۋىلعان مىڭ سابيگە شاققاندا 10 بالا شەتىنەگەن.
نارەستەلەر ءولىمى بويىنشا ەڭ تومەنگى كورسەتكىش استانا قالاسىندا، ودان كەيىنگى ورىنداردا الماتى قالاسى مەن اقمولا وبلىسى تۇر.
باسپا ءسوز قىزمەتىنىڭ حابارلاۋىنشا، نارەستەلەر ولىمىنە كوپ جاعدايدا پەريناتالدىق كەزەڭدەگى اسقىنۋلار مەن ءبىر جاسقا دەيىنگى بالالاردىڭ دامۋىنداعى اقاۋلار، تىنىس الۋ ورگاندارى مەن قاناينالىمى اۋرۋلارى سەبەپ بولادى.
ەسكە سالا كەتەيىك، بۇعان دەيىن قازاقستاندا 2014 - جىلدىڭ 31 - جەلتوقسانى كۇنى 820 ءسابي دۇنيەگە كەلگەنى حابارلانعان بولاتىن. جاڭا جىل كەلەتىن كۇنى جاڭا تۋعان نارەستەلەردىڭ سانى جونىنەن رەسپۋبليكا بويىنشا وڭتۇستىك قازاقستان وبلىسى كوش باستادى. 31 - جەلتوقسان كۇنى وڭىردە 224 بالا تۋىلدى.
ودان كەيىنگى ورىندا الماتى وبلىسى - 87 بالا جانە الماتى قالاسى تۇر - 82 بالا. ءتورتىنشى ورىندا جامبىل وبلىسى، مۇندا 71 بالا تۋىلعان، ال شىعىس قازاقستان وبلىسىندا 67 بالا دۇنيەگە كەلدى.
