بريتانيادا 13 مىڭ قۇل بار

استانا. قازاقپارات - ەۋروپادا ءالى دە باسىبايلى قۇلدار كوپ.

بۇگىندە وركەنيەتتى بريتانيانىڭ وزىندە ەرىكسىز قۇلدىققا جەگىلىپ جۇرگەندەردىڭ سانى 13 مىڭنان اسىپ جىعىلادى ەكەن.

جاقىندا عانا كورولدىكتەگى 50 وڭىردە جۇرگىزىلگەن زەرتتەۋ جۇمىستارىنىڭ ناتيجەسى وسىنى كورسەتتى. قازىر قوعام بەلسەندىلەرى ەل اتىنان ۇكىمەتتى قاتاڭ سىنعا الىپ، جان توزگىسىز جاعدايدا جۇرگەن قۇلداردى بوساتۋدى تالاپ ەتىپ وتىر.

جاريالانعان ستاتيستيكا استارىندا مىڭداعان ادامنىڭ تاعدىرى جاتىر. ونىڭ ءبىرى -  دارەل سيمەستەردىڭ ءومىرى. ونى ۋەلستىڭ استاناسى كارديففكە جاقىن فەرمالاردىڭ بىرىندە 13 جىل بويى تاڭنان كەشكە دەيىن جالاقىسىز قارا جۇمىس ىستەتىپ، كۇشپەن ۇستاعان.

قۇلداردىڭ دەنى نيگەريا، ۆەتنام، البانيا مەن رۋمىنيا سياقتى ەلدەردەن كەلەتىندەر. ەل ۇكىمەتى قۇلداردى بوساتىپ، زاڭسىز شەكارادان ءوتۋدى قاداعالاپ، قازىرگى قۇلدىقتى جويۋ ءۇشىن ارنايى زاڭ قاراستىرامىز دەپ وتىر.

جاڭا قۇجات كەلەسى جىلى مامىر ايىندا بولاتىن سايلاۋدان كەيىن قابىلدانادى دەگەن جوسپار بار. وعان دەيىنگى جارتى جىل ىشىندە ەلدە قۇلدار سانى تاعى قانشاعا وسەتىنى بەلگىسىز.

دەكلان و'براەن، حاتفوردشير گرافتىعىنىڭ تۇرعىنى:

- بۇل قىلمىستار جاسىرىلىپ كەلدى. ولاردى اشكەرەلەۋ كەرەك. شەنەۋنىكتەر قازىر قۇلداردىڭ سانى 13 مىڭنان اسادى دەپ وتىر. ولار ءۇشىن قالىپتى جاعداي شىعار. ءبىراق قاراپايىم حالىق ءۇشىن بۇل سۇمدىق جاعداي.

www.khabar.kz