13,9 ميلليارد جىمقىرعان: ابىلاي مىرزاحمەتوۆ 5 جىلعا باس بوستاندىعىنان ايىرىلدى
استانا. KAZINFORM - استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا اسا ءىرى مولشەردە الاياقتىق جاساعانى ءۇشىن ابىلاي مىرزاحمەتوۆكە قاتىستى قىلمىستىق ءىس قارالدى.
سوتتا انىقتالعانداي، ا. مىرزاحمەتوۆ 2022 -جىلعى مامىر ايىنان قازانعا دەيىن ب. -عا اقشالاي سىياقى ءۇشىن مەملەكەتتىك جانە قۇقىق قورعاۋ ورگاندارىنىڭ جوعارى لاۋازىمدى تۇلعالارى ارقىلى اعاسى ب. -نى قاماۋدان بوساتۋ جانە وعان قاتىستى سوتقا دەيىنگى ءىس جۇرگىزۋدى توقتاتۋ ماسەلەسىن شەشۋگە مۇمكىندىگىنىڭ بار ەكەندىگىن ايتا وتىرىپ، جاڭىلىستىرىپ، الداۋ جانە سەنىمدى تەرىس پايدالانۋ ارقىلى، الاياقتىق جاساۋ جولىمەن فورمالدى تۇردە قارىز شارتتارىن رەسىمدەي وتىرىپ، ب. -نىڭ اسا ءىرى مولشەردە 13,9 ميلليارد تەڭگە سوماسىندا اقشالاي قاراجاتىن جىمقىرعان.
پروكۋرور ايىپتاۋدى قولدادى.
سوتتالۋشى كىناسىن مويىنداپ، ءادىل جازا تاعايىنداۋدى، قورعاۋشىلار ءىس بويىنشا ءىس جۇرگىزۋدى توقتاتۋدى سۇرادى.
سوت ق ك- ءنىڭ 190-بابى 4-بولىگىنىڭ 2) تارماعى بويىنشا كۇدىكتىنى كىنالى دەپ تاپتى. بۇل باپتىڭ سانكتسياسى 5 جىلدان 10 جىلعا دەيىنگى مەرزىمگە باس بوستاندىعىنان ايىرۋ تۇرىندەگى نەگىزگى جازانى كوزدەيدى.
سوت سوتتالۋشىنىڭ كىناسىن مويىنداۋىن، شىن جۇرەكتەن وكىنۋىن، ءوزى جاساعان قىلمىستى تەرگەۋگە جانە قىلمىس جاساۋ ناتيجەسىندە الىنعان مۇلىكتى ىزدەستىرۋگە جاردەمدەسۋىن، كامەلەتكە تولماعان بالاسىنىڭ بولۋىن جاۋاپكەرشىلىك پەن جازانى جەڭىلدەتەتىن ءمان- جايلار رەتىندە تانىدى.
قىلمىستىق جاۋاپتىلىق پەن جازانى اۋىرلاتاتىن ءمان-جايلار انىقتالعان جوق.
ا. مىرزاحمەتوۆتىڭ كىناسى سوتتالۋشىنىڭ ءوز كىناسىن مويىنداۋىمەن، كۋالاردىڭ ايعاقتارىمەن، قارىز شارتتارىمەن جانە قىلمىستىق ءىستىڭ باسقا دا ماتەريالدارىمەن دالەلدەندى.
سوت ۇكىمىمەن ا. مىرزاحمەتوۆ اسا ءىرى مولشەردە الاياقتىق جاساعانى ءۇشىن كىنالى دەپ تانىلىپ، جەرگىلىكتى ءوزىن-ءوزى باسقارۋ ورگاندارىندا جانە كۆازيمەملەكەتتىك سەكتور سۋبەكتىلەرىندە 10 جىل مەرزىمگە قىزمەت اتقارۋ قۇقىعىنان ايىرىلا وتىرىپ، مەملەكەت كىرىسىنە قىلمىستىق جولمەن الىنعان 5,8 ميلليارد تەڭگە سوماسىندا اقشا قاراجاتى تاركىلەنىپ، 5 جىلعا باس بوستاندىعىنان ايىرىلدى.
سوت ق ك- ءنىڭ 49-بابىنىڭ 2-بولىگى نەگىزىندە ق ر پرەزيدەنتىنە ا. مىرزاحمەتوۆتى «قۇرمەت» جانە 3-دارەجەلى «بارىس» وردەنى مەملەكەتتىك ناگرادالارىنان ايىرۋ تۋرالى ۇسىنىس ەنگىزدى.
ا. مىرزاحمەتوۆتىڭ مۇلكىنە سالىنعان تىيىم ساقتالدى.
سوت ۇكىمى زاڭدى كۇشىنە ەنگەن جوق.
ايتا كەتەيىك، 2023 -جىلى 10-مامىردا «اتامەكەن» ۇلتتىق كاسىپكەرلەر پالاتاسى باسقارماسىنىڭ ەكس-ءتوراعاسى ابىلاي مىرزاحمەتوۆ ۇستالدى.
سول جىلى 29-جەلتوقساندا استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى «اتامەكەن» ۇ ك پ بۇرىنعى باسشىسى ابىلاي مىرزاحمەتوۆ ءىسى سوتقا تۇسكەنىن حابارلادى.
2024 -جىلى 22-قاڭتاردا اتامەكەننىڭ بۇرىنعى باسشىسى ابىلاي مىرزاحمەتوۆتىڭ سوتى جابىق وتەتىنى حابارلاندى.
