العاشقى بەتموبيل 137 مىڭ دوللارعا ساتىلدى

استانا. قازاقپارات - امەريكانىڭ داللاس قالاسىندا وتكەن Heritage Auctions ءباسساۋداسىندا تەلەحيكايا كەيپىكەرى بەتمەننىڭ رەسمي ليتسەنزيا العان اۆتوكولىكتەرىنىڭ ەڭ العاشقىسى 137 مىڭ دوللارعا ساتىلدى، دەپ حابارلايدى Reuters.

بىرەگەي اۆتوكولىكتى 1963-جىلى فوررەست روبينسون قۇراستىرعان ەدى. امەريكاندىق سۋپەرباتىردىڭ جانكۇيەرى 1956-جىلى شىققان Oldsmobile 88 اۆتوكولىگىن بەتموبيلگە اينالدىرۋ ءۇشىن ءۇش جىل ۋاقىتىن سارپ ەتكەن. ول ءوز تۋىندىسىن جاساۋدا 1940-50-جىلدارداعى كوميكستەردى باسشىلىققا العان.

روبينسوننىڭ كولىگى اۆتوديزاينەر دجوردج بارريس 1968-جىلعا دەيىن كورسەتىلگەن «بەتمەن» تەلەحيكاياسى ءۇشىن بەتموبيل قۇراستىرعانعا دەيىن بىرنەشە جىل بۇرىن قۇراستىرىلدى. تەلەحيكايا اسا تانىمالدىلىققا يە بولعان سوڭ بەتمان وبرازىنىڭ ليتسەنزياسىنا يە DC Comics روبينسوننىڭ كولىگىن جالداپ، تۋريستىك ماقساتتاردا پايدالانعان.

ارادا بىرنەشە جىل وتكەن سوڭ تەلەحيكايادا پايدالانىلعان كولىكتەردىڭ العاشقى كوشىرمەلەرى قۇراستىرىلعاندا، روبينسون ءوز كولىگىن قايتارىپ الىپ، ساتىپ جىبەرگەن. ونىڭ توت باسىپ قالعان كونسترۋكتسياسى 2008-جىلى نيۋ-گەمپشير شتاتىندا تابىلدى. بىرنەشە ادامنىڭ قولىنان وتكەن سوڭ ونى 2013-جىلدىڭ اقپان ايىندا Toy Car Exchange ينتەرنەت-سەرۆيسى ساتىپ الىپ، ساتىلىمعا قويدى. بەتموبيلدى العاشقى قالپىنا كەلتىرۋمەن Borbon Fabrications كومپانياسى اينالىستى.

2013-جىلدىڭ قاڭتار ايىندا داڭقتى تەلەحيكايا ءۇشىن جاسالعان التى بەتموبيلدىڭ العاشقىسى 4,6 ميلليون دوللارعا - رەكوردتىق سوماعا ساتىلدى.