بيىل وبلىس اكىمى قىرىمبەك كوشەربايەۆتىڭ 135 ءبىلىم گرانتى تاعايىندالادى
بۇل تۋرالى بۇگىن اپپارات ماجىلىسىندە ايماق باسشىسى قىرىمبەك كوشەربايەۆ مالىمدەدى، - دەپ حابارلادى وبلىستىق اكىمدىكتىڭ باسپا ءسوز قىزمەتىنەن.
بيىل وبلىستا 6564 وقۋشى مەكتەپ بىتىرەدى. ولاردىڭ 4559 ى ۇ ب ت- عا قاتىسادى. 2-4- ماۋسىم كۇندەرى ۇلتتىق ءبىرىڭعاي تەستىلەۋ 9 پۋنكتتە وتكىزىلەتىن بولادى. بارلىق تەستىلەۋ پۋنكتتەرى ەرەجە تالاپتارىنا ساي جابدىقتالعان. سونىمەن قاتار، وقۋشىلاردى تاسىمالداۋ، تاماقتاندىرۋ سياقتى ماسەلەلەر دە تولىق شەشىمىن تاپقان.
وتكەن جىلى ۇ ب ت- نىڭ قورىتىندىسى بويىنشا قىزىلوردا وبلىسى رەسپۋبليكاداعى ايماقتار اراسىندا العاشقى بەستىككە ەنگەن بولاتىن. ال مەكتەپ بىتىرگەن تۇلەكتەردىڭ 93,6 پايىزى ارناۋلى جانە جوعارى وقۋ ورىندارىنا تۇسكەن. سونىمەن قاتار، رەسەي ۇكىمەتىنىڭ ءبىلىم گرانتتارى نەگىزىندە 321 سىربويىلىق ماسكەۋ مەن سانكت-پەتەربۋرگتا ءبىلىم الۋدا.
- ۇلتتىق ءبىرىڭعاي تەستىلەۋگە قاتىساتىن تۇلەكتەر ءۇشىن بارلىق جاعداي جاسالۋى ءتيىس. بالالاردان ارتىق ەشنارسە جوق. سوندىقتان، جاۋاپتى باسقارمالار مەن قالا جانە اۋدانداردىڭ اكىمدەرى تەست وتەتىن پۋنكتتەرگە، ولاردىڭ جاتىن ورىندارىنا تىكەلەي جاۋاپتى. ۇلتتىق ءبىرىڭعاي تەستىلەۋدى ۇيىمداستىرۋ جوعارى دەڭگەيدەگى جاۋاپكەرشىلىكپەن وتكىزىلۋ قاجەت. ونىڭ ناتيجەسى ايماقتاعى ءبىلىم بەرۋ سالاسىنىڭ كورسەتكىشى جانە وبلىس دامۋىنىڭ بولاشاعى، - دەدى وبلىس اكىمى قىرىمبەك كوشەربايەۆ.
بۇگىنگى اپپارات ماجىلىسىندە وقۋشىلاردىڭ جازعى دەمالىسىن ۇيىمداستىرۋ ماسەلەسى دە قارالدى. جالپى بيىلعى جىلى وبلىس بويىنشا 1-10- سىنىپ ارالىعىنداعى بالالار سانى 124994. ونىڭ %93 جازعى دەمالىسپەن قامتىلادى. قازىر ايماقتا 8 دەمالۋ-ساۋىقتىرۋ لاگەرى جۇمىس جاسايدى. بيىل وسى اتالعان 8 لاگەردە بارلىعى 8570 بالا تىنىعاتىن بولادى. وبلىس اكىمى ايماقتاعى بارلىق لاگەرلەر ۇزدىكسىز، جىل بويى جۇمىس ىستەۋىن قاتاڭ تاپسىردى. سونىمەن قاتار، جەتىم بالالاردىڭ، اتا-انالارىنىڭ قامقورلىعىنسىز قالعان، تۇرمىسى تومەن جانە كوپ بالالى وتباسىلار بالالارىنىڭ، مۇگەدەك بالالاردىڭ، دامۋ مۇمكىندىكتەرى شەكتەۋلى بالالاردىڭ، جالپى ءبىلىم بەرەتىن مەكتەپتەردىڭ ۇزدىك وقۋشىلارىنىڭ ساۋىقتىرۋ دەمالىسىن باسىم تارتىپپەن جەرگىلىكتى بيۋدجەت قاراجاتى ەسەبىنەن قامتاماسىز ەتىلۋىن تاپسىردى.
اۆتور: ەلۋباي اۋەزوۆ
