بەرليندە نەمىستەردىڭ 134000 سولداتى مەن وفيتسەرى تۇتقىندالدى - 1945 - جىلدىڭ 3 - مامىرى
بۇل تۋرالى كەڭەس اقپارات بيۋروسىنىڭ مالىمەتىندە جاريا ەتىلدى.
«بەرلين قالاسىنىڭ سولتۇستىك- باتىسىندا 1- بەلورۋس مايدانىنىڭ اسكەرلەرى شابۋىل جۇرگىزە وتىرىپ، ۆيلسناك، گلەۆەن، شتيۋدە- نيتتس، نيتتسوۆ، ۆەلگاست، شترودەنە، رينوۆ، شپاتتس، حوەن- ناۋەن ەلدى- مەكەندەرىن ۇرىسپەن الدى. ءسويتىپ، ۆيتتەنبەرگ قالاسىنىڭ وڭتۇستىك- باتىس جاعىندا ەلبا وزەنى بويىندا وداقتاس امەريكان اسكەرلەرىمەن قوسىلدى»، - دەلىنگەن مالىمەتتە.
ال 2- مامىر كۇنى بەرلين قالاسىندا كەشكى 21 ساعاتتان كەيىن مايدان اسكەرلەرى قوسىمشا 20000 نان استام نەمىس سولداتى مەن وفيتسەرىن تۇتقىندادى، سونداي- اق گوسپيتالدارداعى 10700 جارالى نەمىس سولداتى مەن وفيتسەرى دە قولعا ءتۇستى.
«2- مامىردا مايدان اسكەرلەرى 100700 نەمىس سولداتى مەن وفيتسەرىن تۇتقىنداعان بولاتىن. سونىمەن قاتار وسى كۇنى 1- ۋكراين مايدانىنىڭ اسكەرلەرى بەرلين اۋدانىندا 34000 نان استام نەمىس سولداتى مەن وفيتسەرىن قولعا ءتۇسىرىپ، 34 تانك پەن 140 تان استام دالا زەڭبىرەگىن ولجالادى. قولعا تۇسكەندەردىڭ ىشىندە نەمىستەردىڭ 236- جاياۋ اسكەر ديۆيزياسىنىڭ كومانديرى، گەنەرال- مايور روبەن دە بار.
وسىلايشا، 3- مامىرعا قاراي بەرلين اۋماعىندا 134000 نان استام نەمىس سولداتى مەن وفيتسەرى قولعا ءتۇستى. ولاردىڭ 100000-ىن 1- بەلورۋس مايدانىنىڭ اسكەرلەرى، ال 34000-ىن 1- ۋكراين مايدانىنىڭ اسكەرلەرى تۇتقىندادى»، - دەلىنگەن مالىمەتتە.
سونىمەن قاتار، 3- مامىر كۇنى پيللاۋ قالاسىنىڭ ءارى پورتىنىڭ وڭتۇستىك باتىسىندا 3- بەلورۋس مايدانىنىڭ اسكەرلەرى فريش نەرۋنگ ءمۇيىسىن جاۋدان ازات ەتۋ ءۇشىن ۇرىستار جۇرگىزىپ، كالبەرگ ليپ جانە كايزەرحوف ەلدى مەكەنىن باسىپ الدى.
2- بەلورۋس مايدانىنىڭ اسكەرلەرى بولسا شابۋىلدى دامىتا وتىرىپ، بارت، باد دوبەران، نويبۋكوۆ، ۆارين، ۆيتتەنبەرگ قالالارىن الىپ، 3 - مامىر كۇنى ۆيس- مار- ۆيتتەنبەرگ مەجەسىندە اعىلشىن اسكەرلەرىمەن قوسىلدى. مايدان اسكەرلەرى سونىمەن قاتار، كرەپەلين، نوي كلوستە، بيۋتتسوۆ، پوستروۆ، گولدبەرگ، كاروۆ، مەيەنبۋرگ، پۋتليتتس، پريتتسۆالك جانە پەر- لەبەرگ ەلدى مەكەندەرىن الدى. ال 2 - مامىردا بولعان ۇرىستاردا مايدان اسكەرلەرى 10600 نەمىس سولداتى مەن وفيتسەرىن قولعا ءتۇسىرىپ، 328 ۇشاقتى ولجالادى. قولعا تۇسكەندەردىڭ ىشىندە ەڭبەك مىندەتكەرلىگى ىستەرى بويىنشا 5- شتەتتين وكرۋگىنىڭ قولباسشىسى، گەنەرال- مايور ماتو دا بار.
چەحوسلوۆاكيانىڭ پارتيزاندارى نەمىستەردىڭ 16- تانك ديۆيزياسىنىڭ كومانديرى، گەنەرال- مايور ميۋللەردى تۇتقىنداپ، ءبىزدىڭ اسكەرلەرگە تابىستادى.
2- مامىر كۇنى بارلىق مايداندا 53 نەمىس تانكى مەن وزدىگىنەن جۇرەتىن زەڭبىرەگى قيراتىلدى جانە جويىلدى.
اۆتور: جاپپاربەرگەن ايبوتا
