13:31, 29 - ناۋرىز 2021 | GMT +5
ەلىمىزدە ادام ساۋداسىنا قاتىستى 133 قىلمىستىق ءىس تەرگەلىپ جاتىر
نۇر-سۇلتان. قازاقپارات - ىشكى ىستەر مينيسترلىگى تەرگەۋ دەپارتامەنتىنىڭ باسشىسى سانجار ءادىلوۆ ادام ساۋداسىنا قاتىستى 133 قىلمىستىق ءىس تەرگەلىپ جاتقانىن ءمالىم ەتتى.
«ادام ساۋداسىنا قارسى ءىس- قيمىل قادامدارى ىشكى ىستەر ورگاندارى ءۇشىن ۇنەمى وزەكتى. سەبەبى بۇل پروبلەما ازاماتتاردىڭ قۇقىعى مەن بوستاندىعىنا نۇقسان كەلتىرەدى. بۇل باعىتتاعى جۇمىستار مينيسترلىك باسشىلىعىنىڭ تۇراقتى باقىلاۋىندا تۇرعانىن اتاپ وتكەن ءجون. قازىرگى كەزدە ىشكى ىستەر ورگاندارىنىڭ قىزمەتكەرلەرى اتالعان قۇقىق بۇزۋشىلىق بويىنشا 133 قىلمىستىق ءىستى تەرگەپ جاتىر. قىلمىستىق جاۋاپكەرشىلىككە 48 ادام تارتىلىپ جاتىر»، دەدى س. ءادىلوۆ ونلاين رەجىمدەگى بريفينگىدە.
