جۇرگىزۋشى كۋالىگىنەن ايرىلسا دا، كولىك تىزگىندەگەن 133 سولتۇستىك قازاقستاندىق قاماۋعا الىندى

پەتروپاۆل. قازاقپارات - سولتۇستىك قازاقستان وبلىسىندا «قاۋىپسىز جول» رەسپۋبليكالىق جەدەل- پروفيلاكتيكالىق ءىس- شاراسىنىڭ قورىتىندىسى شىعارىلدى، دەپ حابارلايدى قازاقپارات ءتىلشىسى.

س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جەدەل-الدىن الۋ شاراسى 5 كۇن ءوتىپ، 400 دەن استام پوليتسەي كۇندەلىكتى رەيدتەرگە شىققان.

«پوليتسەيلەرگە جولدا ءجۇرۋ ەرەجەلەرىن بۇزۋشىلاردى انىقتاپ قانا قويماي، ءتۇسىندىرۋ جانە پروفيلاكتيكالىق جۇمىستاردى بەلسەندى جۇرگىزۋ مىندەتى قويىلدى. جول-كولىك وقيعالارى كوبىنە رولگە ماس كۇيدە وتىرۋ سالدارىنان بولادى. سونداي- اق ءجيى كەزدەسەتىن بۇزۋشىلىقتار: جىلدامدىقتى اسىرۋ، مانيەۆر جاساۋ ەرەجەسىن بۇزۋ، كوشە قيىلىستارىن دۇرىس وتپەۋ. جولاۋشىلاردىڭ دا جولدا ءجۇرۋ ەرەجەسىن بۇزۋى جول- كولىك وقيعاسىنا اكەپ جاتادى»، - دەيدى س ق و پوليتسيا دەپارتامەنتى باستىعىنىڭ مىندەتىن اتقارۋشى دۋمان تايەۆ.

«قاۋىپسىز جول» رەسپۋبليكالىق ءىس-شاراسىنىڭ ماقساتى - جول-كولىك اپاتتارىنىڭ الدىن الۋ، جولدا ءجۇرۋ ەرەجەلەرىن ورەسكەل بۇزۋشىلاردى انىقتاۋ.

بەس كۇندە جولدا ءجۇرۋ ەرەجەلەرىن بۇزۋدىڭ 2725 دەرەگىن انىقتالدى. قاۋىپسىزدىك بەلبەۋىن تاقپاۋدىڭ - 459, كولىك جۇرگىزىپ كەلە جاتىپ تەلەفونمەن سويلەسۋدىڭ - 383 جانە جىلدامدىقتى اسىرۋدىڭ 298 فاكتىسى تىركەلدى. بۇدان باسقا، پوليتسەيلەر رولگە ماس كۇيدە وتىرعان 46 جۇرگىزۋشىنى ۇستاعان. 352 بۇزۋشىلىق - جۇرگىنشىلەرگە قاتىستى.

جالپى س ق و-دا جىل باسىنان ماس كۇيدە كولىك تىزگىندەگەن 750 ادام جاۋاپكەرشىلىككە تارتىلعان. سونداي-اق 561 تۇرعىن بۇعان دەيىن جۇرگىزۋشى كۋالىگىنەن ايىرىلسا دا، ماس كۇيدە قايتا رولگە وتىرعان. ولاردىڭ 133 ى سوتتىڭ شەشىمىمەن اكىمشىلىك قاماۋعا الىندى.

اۆتور: اقەركە داۋرەنبەك قىزى