تايۆانداعى جەر سىلكىنىسىندە 132 ادام ءۇيىندى استىندا قالدى

استانا. قازاقپارات - بۇعان دەيىن تايۆانداعى تاينان قالاسىندا جەر سىلكىنگەنى تۋرالى حابارلانعان بولاتىن.

سوڭعى اقپاراتتارعا سۇيەنسەك، ءزىلزالادا قيراعان 17 قاباتتى عيمارات ءۇيىندىسى استىندا كەم دەگەندە 132 ادام قالدى، دەپ حابارلادى «bbc» اگەنتتىگى.

كوپ قاباتتى تۇرعىن ۇيدە 96 پاتەر بولعان، وندا 256 ادام قونىستانعان. جەر استى دۇمپۋىنەن ءۇي ەكىگە قاق ايىرىلعان، ونىڭ جوعارعى بولىگى جەرگە قۇلادى.

قۇتقارۋشىلار حابارلاعانداي، قازىر ولار بەرگى جاقتاردى عانا تەكسەرە الدى. ال كۇردەلى ورىندارعا جەتۋ ءۇشىن اۋىر قۇرىلىس تەحنيكاسى قاجەت.

سوڭعى دەرەكتەردە 18 ادام جەر سىلكىنىسىنىڭ قۇربانى بولعانى، 500 گە جۋىق ادام جارالانىپ، 300 دەن استام ادام قۇتقارىلعانى ايتىلعان.