پاريجدە 130 ادامنىڭ ءومىرىن قيعان تەراكتىلەرگە كۇدىكتى بەلگيادا ۇستالدى
بريۋسسەلدە تۋعان فرانسۋز ازاماتى سالاح ابدەسلام فرانسيا استاناسىندا جاسالعان تەررورلىق شابۋىلدارعا قاتىسى بار دەگەن كۇدىككە ىلىنگەندەردىڭ اراسىندا ءتىرى قالعان جالعىز ادام سانالادى. بريۋسسەلدىڭ مولەنبەك اۋدانىندا كۇدىكتىنى ۇستاۋ بارىسىندا ول اياعىنان جارالانعان.
پوليتسيا ابدەسلامدى قولعا تۇسىرگەن سوڭ دا ارنايى وپەراتسيانى جالعاستىرىپ، سول كۇنى تاعى بىرنەشە ادامدى ۇستاعان.
بۇعان دەيىن جۇما كۇنى بەلگيا پروكۋراتۋراسى سودان بىرنەشە كۇن بۇرىن سالاح ابدەسلام تىعىلعان دەگەن كۇدىككە ىلىنگەن پاتەردەن تابىلعان ونىڭ ساۋساق ىزدەرىنىڭ تابىلعانىن مالىمدەگەن.
بۇل مالىمدەمەدەن كەيىن بەلگيا اقپارات قۇرالدارى پوليتسيا سەيسەنبىدە جۇرگىزگەن وپەراتسيا كەزىندە ابدەسلام ءىز جاسىرىپ ۇلگەرگەن بولۋى مۇمكىن دەگەن جورامال جاساعان ەدى.
بريۋسسەلدەگى وپەراتسيانى بەلگيالىق جانە فرانسۋز ارنايى قىزمەتتەرى بىرلەسىپ جۇرگىزگەنى ايتىلادى. بريۋسسەلدە ەۋروپا وداعى سامميتىنە قاتىسقان فرانسيا پرەزيدەنتى فرانسۋا وللاند مولەنبەكتەگى وپەراتسيانىڭ بارىسىن بەلگيا پرەمەر-ءمينيسترى شارل ميشەلمەن بىرگە باقىلاعان دەپ حابارلاندى.
2015-جىلى 13- قاراشادا پاريجدە جاسالعان تەررورلىق شابۋىلدار سالدارىنان 130 ادام قازا تاپقان.
