يپوتەكالىق قارىز الۋشىلاردىڭ ماسەلەلەرىن شەشۋ ءۇشىن ۇلتتىق بانك 130 ميلليارد تەڭگە قارجى ءبولدى

 استانا. قازاقپارات - ق ر ۇكىمەتىنىڭ مەملەكەت باسشىسى نۇرسۇلتان نازاربايەۆتىڭ قاتىسۋىمەن 11- اقپاندا وتكەن كەڭەيتىلگەن وتىرىسىندا پرەزيدەنت ق ر ۇلتتىق بانكىنە ۇكىمەتپەن بىرلەسىپ يپوتيكالىق قارىز الۋشىلاردىڭ پروبلەمالارىن شەشۋ جونىندەگى شارالار كەشەنىن ازىرلەۋدى تاپسىرعان ەدى.

ق ر ۇكىمەتى جانە ۇلتتىق بانك مەملەكەت باسشىسىنىڭ تاپسىرماسىن ىسكە اسىرۋ ءۇشىن يپوتيكالىق قارىز الۋشىلاردىڭ پروبلەمالارىن شەشۋ ماقساتىندا ۇلتتىق بانكتىڭ قاراجاتىنان 130 ميلليارد تەڭگە ءبولۋ تۋرالى شەشىم قابىلدادى.

ۇلتتىق بانك «پروبلەمالىق كرەديتتەر قورى» ا ق- تى 130 ميلليارد تەڭگە سوماسىنا ۇستەمە كاپيتالداندىرادى، ول، ءوز كەزەگىندە، ەكىنشى دەڭگەيدەگى بانكتەردە جىلدىق 2,99%- دىق سىياقى مولشەرلەمەسىمەن 20 جىل مەرزىمگە دەپوزيتتەردى ورنالاستىرادى. بۇل قاراجاتتى بانكتەر جەكە تۇلعالاردىڭ يپوتەكالىق تۇرعىن ءۇي/يپوتيكالىق قارىزدارىن قايتا قارجىلاندىرۋعا جىبەرەدى، دەپ حابارلاندى ۇلتتىق بانكتىڭ رەسمي سايتىندا.

«باعدارلامانىڭ ماقساتتارى:

 - قارىز الۋشىلاردىڭ بارىنشا كوپ بولىگى ءۇشىن يپوتەكالىق قارىزداردى وتەۋ تالاپتارىن جەڭىلدەتۋ؛

- پروبلەمالىق كرەديتتەر دەڭگەيىن تومەندەتۋ؛

- ەكونوميكانىڭ دوللارلانۋ دەڭگەيىن تومەندەتۋ» ، دەلىنگەن حابارلامادا.

باعدارلامانىڭ نەگىزگى ولشەمدەرىنە سايكەس قارىز الۋشىنىڭ جانە ونىڭ جۇبايىنىڭ (زايىبىنىڭ) جالعىز باسپاناسى كەپىلگە سالىنعان، 2004-2009 -جىلدار ارالىعىنداعى كەزەڭدە بەرىلگەن يپوتەكالىق تۇرعىن ءۇي، يپوتەكالىق قارىزدار قايتا قارجىلاندىرىلادى.

ول ءۇشىن قويىلاتىن باستى تالاپتار مىنالار: جىلدىق 3%- دان اسپايتىن سىياقى مولشەرلەمەسى بويىنشا ۆاليۋتالىق قارىزداردى تەڭگەگە كونۆەرتاتسيالاۋ، قارىز مەرزىمىن 20 جىلعا دەيىن ۇلعايتۋ.

وسى باعدارلاما ەڭ الدىمەن حالىقتىڭ الەۋمەتتىك ءالسىز توپتارىنا جاتاتىن يپوتەكالىق قارىز الۋشىلارعا؛ شەتەل ۆاليۋتاسىمەن يپوتەكالىق تۇرعىن ءۇي، يپوتەكالىق قارىز العاندارعا؛ ۇلتتىق ۆاليۋتامەن يپوتەكالىق تۇرعىن ءۇي، يپوتەكالىق قارىز العان جانە مەرزىمى وتكەن بەرەشەگى بار قارىز الۋشىلارعا قولداۋ كورسەتۋگە باعىتتالادى.

سونداي- اق زاڭدى كۇشىنە ەنگەن سوت اكتىلەرى بار يپوتەكالىق تۇرعىن ءۇي، يپوتەكالىق قارىزدار باعدارلاما شەڭبەرىندە قايتا قارجىلاندىرۋعا جاتادى.

قارىز الۋشىنىڭ بورىشتىق جۇكتەمەسىن جەڭىلدەتۋ ماقساتىندا نەگىزگى بورىشتىڭ قالدىعى قايتا قارجىلاندىرىلادى، بۇل رەتتە قارىز الۋشىنىڭ قايتا قارجىلاندىرىلعان قارىزى بويىنشا سىياقى، كوميسسيالار، تۇراقسىزدىق ايىبى بويىنشا بەرەشەگىن بانكتەر كەشىرەدى.

بانكتەردىڭ قارىزدى قايتا قارجىلاندىرۋ كەزىندە قانداي دا بولماسىن كوميسسيالاردى، الىمداردى نەمەسە وزگە تولەمدەردى الۋعا قۇقىعى جوق.

باعدارلاما شەڭبەرىندە بولجاممەن العاندا 20000 نان استام قارىز، ونىڭ ىشىندە حالىقتىڭ الەۋمەتتىك ءالسىز توپتارى ساناتىنا جاتاتىن 5000 نان استام بورىشكەردىڭ قارىزى قايتا قارجىلاندىرىلاتىن بولادى.

باعدارلاما 2015 - جىلعى 10 - ساۋىردە ۇلتتىق بانكتىڭ ديرەكتورلار كەڭەسىندە ماقۇلداندى.