ۇ ق ش ۇ ەلدەرىنىڭ 130 دان استام اسكەري قىزمەتشىسى قازاقستاننىڭ جوعارى اسكەري وقۋ ورىندارىندا ءبىلىم الۋدا

استانا. قازاقپارات - ۇجىمدىق قاۋىپسىزدىك تۋرالى شارت ۇيىمىنا (ۇ ق ش ۇ) مۇشە مەملەكەتتەردىڭ اسكەري وقۋ ورىندارى مەن عىلىمي ۇيىمدارى وسى ۇيىمنىڭ اسكەري قۇرامداس بولىگىن دامىتۋدا ماڭىزدى بۋىن بولىپ وتىر.

بۇل تۋرالى ەكاتەرينبۋرگتە وتكەن ۇ ق ش ۇ اسكەري كەڭەسىنىڭ وتىرىسىندا ءسوز بولدى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.

اسكەري وقۋ ورىندارىندا ۇ ق ش ۇ-عا قاتىسۋشى مەملەكەتتەر اسكەري قىزمەتشىلەرىنىڭ دايارلىعىن جەتىلدىرۋ ماسەلەلەرى اياسىندا اسكەري كادرلاردى دايارلاۋ 44 جوعارى وقۋ ورنىندا، سونىڭ ىشىندە قازاقستانننىڭ ءتورت اسكەري وقۋ ورنىندا جۇرگىزىلىپ كەلە جاتقانى اتاپ ءوتىلدى. بۇگىنگى تاڭدا ءبىزدىڭ ەلىمىزدە ارمەنيادان، قىرعىزستاننان، تاجىكستاننان كەلگەن 130 دان استام اسكەري قىزمەتشى ءبىلىم الۋدا.

ۇ ق ش ۇ اسكەري كوميتەتىنىڭ وتىرىسىندا بۇدان باسقا ۇجىمدىق قاۋىپسىزدىك وڭىرلەرىندەگى اسكەري قاۋىپسىزدىككە تونەتىن قاۋىپ-قاتەرلەر، ءبىرتۇتاس (بىرىككەن) اۋە شابۋىلىنا قارسى جانە زىمىران شابۋىلىنا قارسى قورعانىس جۇيەسىن قۇرۋ، ۇ ق ش ۇ-عا قاتىسۋشى مەملەكەتتەر ۇجىمدىق كۇشتەرىن باسقارۋدى ۇيىمداستىرۋ ماسەلەلەرى تالقىلاندى.

ۇ ق ش ۇ اسكەري كوميتەتىنىڭ وتىرىسىنا قورعانىس ءمينيسترىنىڭ ءبىرىنشى ورىنباسارى - قازاقستان رەسپۋبليكاسى قارۋلى كۇشتەرى باس شتابىنىڭ باستىعى گەنەرال-پولكوۆنيك ساكەن جاسۇزاقوۆ باستاعان قازاقستاندىق دەلەگاتسيا قاتىستى.

ەسكە سالا كەتسەك، ۇجىمدىق قاۋپسىزدىك تۋرالى شارت ۇيىمى (ۇ ق ش ۇ) 1992-جىلعى 15- مامىردا ت م د-عا مۇشە مەملەكەتتەر قول قويعان ۇجىمدىق قاۋىپسىزدىك تۋرالى شارت نەگىزىندە قۇرىلعان. ۇ ق ش ۇ قۇرامىنا ارمەنيا، بەلارۋس، قازاقستان، قىرعىزستان، رەسەي جانە تاجىكستان كىرەدى.