13 ادامنىڭ ءولىمى: جەرتولەدە ورنالاسقان الماتى حوستەلىندە كوبىنە شەتەلدىكتەر تۇرعان
الماتىدا ورتكە ورانعان حوستەلدەن ەۆاكۋاتسيالانعان ادامداردىڭ باسىم بولىگى شەتەل ازاماتتارى، دەپ حابارلايدى Kazinform.
الماتى قالالىق توتەنشە جاعدايلار دەپارتامەنتىنىڭ باسشىسى نۇرلان اتىعايەۆتىڭ ايتۋىنشا، ەۆاكۋاتسيالانعان ادامداردىڭ كوبى شەتەلدىكتەر.
«حوستەل اكىمشىلىگىنىڭ سوزىنشە، ءوز بەتىمەن سىرتقا شىققان ادامداردىڭ دەنى وزبەكستان، قىرعىزستان، پاكىستان ەلدەرىنىڭ ازاماتتارى. ارالارىندا قازاقستاندىقتار دا بار. قازا تاپقانداردىڭ كىم ەكەنى انىقتالىپ جاتىر»، - دەدى ول.
سونىمەن قاتار دەپارتامەنت باسشىسى ورتكە ورانعان حوستەلدىڭ اشىلعانىنا ءبىر جارىم اي بولعانىن ءمالىم ەتتى.
«ءۇش قاباتتى عيماراتتىڭ جەرتولەسىنەن حوستەل اشقان. بۇل، نەگىزى، زاڭعا قايشى. سەبەبى جەرتولە ادام تۇرۋعا ارنالماعان. قانشا جەردەن جابدىقتالسا دا»، - دەدى نۇرلان اتىعايەۆ.
بەلگىلى بولعانىنداي، استانادان ق ر توتەنشە جاعدايلار ءمينيسترى سىرىم ءشارىپحانوۆ ۇشىپ شىقتى.
ەسكە سالايىق، بۇگىن مەگاپوليستە حوستەل ورتەنىپ، 13 ادام قازا تاپتى.
دارىگەرلەر ورتتەن زارداپ شەككەن 2 ادامعا كومەك كورسەتتى. ولار اۋرۋحاناعا جەتكىزىلىپ، كەيىن امبۋلاتورلىق ەم قابىلداۋ ءۇشىن ۇيلەرىنە جىبەرىلدى.
وقيعا ورنىنان 59 ادام ەۆاكۋاتسيالانىپ، 56 سى جاقىن ماڭداعى مەكتەپكە ۋاقىتشا ورنالاستىرىلدى.
