قىتايدا جىل سايىن 13,1 ميلليون جۇمىس ورىنى اشىلادى - ەلشى حانحۋەي

استانا. قازاقپارات - بۇگىن استاناداعى باسپا ءسوز ءماسليحاتىندا قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چجان حانحۋەي ءوز ەلىندەگى قازىرگى الەۋمەتتىك- ەكونوميكالىق جاعداي تۋرالى ايتىپ بەردى، دەپ حابارلايدى قازاقپارات ءتىلشىسى.

 ەلشىنىڭ سوزىنە قاراعاندا، قىتايدا جىل سايىن 13,1 ميلليون جاڭا جۇمىس ورىندارى اشىلادى. قازىرگى جۇمىسسىزدارمەن قاتار جىلدا 5,5 ميلليون جوعارى وقۋ ورىندارىنىڭ تۇلەكتەرى ەڭبەك نارىعىنا جولداما الادى. ولاردى دا جۇمىسپەن قامتۋ قاجەت.

«ەندى، قازىرگى كەزدە قالالاردا جۇمىسسىزدىقتىڭ دەڭگەيىن 4,5 پايىزدان اسىرماۋ مىندەتى تۇر. دەگەنمەن، ونىڭ بارلىعى ستاتيستيكا ەكەنىن مەن دە جاقسى تۇسىنەمىن. سەبەبى وندىرىستىك جاڭعىرتۋ جۇمىستارىنىڭ ناتيجەسىندە كوپتەگەن ادامدار جۇمىسسىز قالىپ جاتادى. وسىعان بايلانىستى مەملەكەت ونداي ادامداردى قايتا دايارلاپ، جۇمىسپەن قامتۋ شارالارىن جۇرگىزىپ وتىرادى»، - دەيدى حانحۋەي مىرزا.

 ونىڭ ايتۋىنشا، بۇگىندە قىتاي كوممۋنيستىك پارتياسىنىڭ باستى ماقساتى - كەدەيشىلىكتى تولىعىمەن جويۋ. الداعى بەس جىلدا اتالعان ماقساتتى ورىنداۋ مىندەتى قويىلدى. ول ءۇشىن جىل سايىن 10 ميلليون ادامدى كەدەيشىلىكتەن شىعارىپ وتىرۋ قاجەت.

اۆتور: ارمان اسقاروۆ