ەلىمىزدىڭ 12 وڭىرىندە «اباي مەكتەپتەرى» اشىلدى - مينيستر
اباي مەكتەپتەرىندە «قازاق ءتىلى»، «قازاق ادەبيەتى» جانە «اباي تانۋ» پاندەرى بويىنشا تەرەڭدەتىلگەن وقۋ باعدارلاماسى بەكىتىلگەن.
قازاقتىڭ باس اقىنى، حاكىم اباي قۇنانباي ۇلىنىڭ تۋعان كۇنىنە وراي پوست جازعان مينيستر اباي كۇنىنە وراي ەلىمىزدىڭ ءار تۇكپىرىندە وقۋشىلار مەن ۇستازداردىڭ قاتىسۋىمەن ءتۇرلى شارالار وتكىزىلىپ جاتقانىن جانە «اباي وقۋلارى» بايقاۋى بۇگىن ءوز مارەسىنە جەتكەنىن ايتتى.
«ۇلى ويشىلدىڭ بىزگە قالدىرعان اسىل مۇراسى وتانشىل، ادال، پاراساتتى، ءبىلىمدى، بىلىكتى ۇرپاق تاربيەلەۋدىڭ نەگىزى دەپ ايتساق ارتىق ەمەس. مەملەكەت باسشىسى قاسىم- جومارت توقايەۆتىڭ گۋمانيتارلىق باعىتتاعى اباي مەكتەپتەرىن اشۋ تۋرالى تاپسىرماسىنا سايكەس ەلىمىزدىڭ 12 وڭىرىندە «اباي مەكتەپتەرى» جەلىسى قۇرىلعان بولاتىن»، - دەدى عاني بەيسەمبايەۆ.
وقۋ- اعارتۋ ءمينيسترىنىڭ ايتۋىنشا، اتالعان ءبىلىم وشاقتارىندا قازاق ءتىلى مەن ادەبيەتى تەرەڭدەتە وقىتىلىپ، باسەكەگە قابىلەتتى، ەلدىڭ دامۋىنا ۇلەس قوساتىن ەلجاندى تۇلعالار تاربيەلەنۋدە.
«الماتىداعى اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان مەكتەپ- ينتەرناتى وسى مەكتەپتەردىڭ ورتالىق بازاسى بولىپ بەلگىلەنىپ، وقۋ- ادىستەمەلىك كەشەن دايارلاۋ، تاجىريبە تاراتۋ جۇمىستارى جۇزەگە اسىرىلۋدا»، - دەدى مينيستر.
ءمالىم بولعانداي، «Amanat» پارتياسىنىڭ «حالىقپەن بىرگە!» سايلاۋالدى باعدارلاماسى شەڭبەرىندە 2027 -جىلعا دەيىن بارلىق وڭىردە «اباي مەكتەپتەرى» اشىلماق.
