فرانسيادا گەرمانيا ازاماتى ايەلىن 12 جىل تۇتقىندا ۇستاپ كەلگەن
فرانسيا پوليتسياسى ايەلدى ەرلى- زايىپتى تۇرىپ جاتقان پاتەردىڭ جاتىن بولمەسىنەن تاپتى. ونىڭ شاشى تاقىرلانىپ الىنعان. جاتىن بولمەنىڭ ەسىگى تەمىر سىمدارمەن جابىلعان. ايەل قاشىپ كەتپەۋ ءۇشىن جاسالعان بولۋى كەرەك.
ەلى- زايىپتىنىڭ ءۇيى گەرمانيامەن شەكاراعا جاقىن جەردە ورنالاسقان. 53 جاستاعى ايەل امالىن تاۋىپ گەرمانيانىڭ پوليسيا بولىمشەسىنە حابارلاسقان، ولار ءوز كەزەگىندە فرانسۋزدىق ارىپتەستەرىنە جەتكىزگەن.
ايەلدى تاۋىپ، تەكسەرگەننەن كەيىن دەنساۋلىعى ناشار ەكەنى انىقتالدى. پاتەردە ايەلدەن باسقا ون شاقتى مىسىق بولعان.
فرانسيا پوليتسياسى ايەلدىڭ دەنەسىندە قان نەمەسە زورلىق- زومبىلىق بەلگىلەرى بولماعانىن حابارلادى.
ونىڭ 55 جاستاعى كۇيەۋى ادام ۇرلاۋ جانە باسقا دا قىلمىستار جاسادى دەگەن كۇدىكپەن ۇستالدى. ءدال قازىرگى ۋاقىتتا ونىڭ جۇمىسسىز ەكەنى بەلگىلى بولدى. بۇرىن گەرمانيادا ونەركاسىپ سالاسىندا جۇمىس ىستەگەن.
نەمىستىڭ Bild گازەتى ەرلى- زايىپتىنىڭ كورشىلەرىنەن سۇحبات العان. كۇيەۋى كورشىلەرىنە ايەلى قاتەرلى ىسىككە شالدىققانىن، سودان قينالىپ ايعايلايتىنىن ايتقان.
