20:41, 26 - شىلدە 2023 | GMT +5
مال جايۋعا بەرىلگەن 12 ميلليون گەكتار جەردە ءتورت تۇلىك جوق - مينيسترلىك
استانا. قازاقپارات - سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگى عارىشتىق مونيتورينگ ناتيجەسىندە پايدالانىلماي جاتقان 1 ميلليون گەكتار ەگىستىك جەردى انىقتادى، دەپ حابارلايدى قازاقپارات ءتىلشىسى.

«جەر پايدالانۋ مونيتورينگى بويىنشا 1 ميلليون گەكتار پايدالانىلمايتىن ەگىستىك جەرلەر، 817 مىڭ گەكتار ەگىستىك جەرلەردى ماقساتسىز پايدالانۋ، 12 ميلليون گەكتار مالى جوق جايىلىمدىق القاپتار انىقتالدى. پايدالانىلمايتىن جايىلىمدىق جەرلەر الماتى وبلىسىندا - 1,3 ميلليون گەكتار، اقتوبە وبلىسىندا - 1,3 ميلليون گەكتار، قاراعاندى وبلىسىندا - 1,3 ميلليون گەكتار»، - دەپ توقتالدى ايەروعارىش كوميتەتىنىڭ ءتوراعاسى باۋبەك ورالماعامبەتوۆ و ك ق- دا وتكەن بريفينگىدە.
ونىڭ ايتۋىنشا، پايدالانىلمايتىن جاتقان ەگىستىك جەرلەر قوستاناي (277 مىڭ گەكتار) ، سولتۇستىك قازاقستان (126 مىڭ گەكتار) جانە اباي وبلىستارىندا (90 مىڭ گەكتار) كوپ انىقتالعان.
سونىمەن قاتار سپيكەر بىلتىر قازاقستان بويىنشا 5683 رۇقسات ەتىلمەگەن قوقىس وبەكتىلەرى انىقتالعانىن ايتتى.