ۇكىمەتتىڭ وتكەن جىلعى رەسپۋبليكالىق بيۋدجەت تۋرالى ەسەبىن ماقۇلداۋعا 12 دەپۋتات قارسى بولدى

None
استانا. قازاقپارات - ءماجىلىس ۇكىمەت جانە جوعارى اۋديتورلىق پالاتانىڭ 2022 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەبىن ماقۇلدادى، دەپ حابارلايدى قازاقپارات ءتىلشىسى.

ءماجىلىستىڭ جالپى وتىرىسىندا پرەمەر- ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ پەن جوعارى اۋديتورلىق پالاتانىڭ ءتوراعاسى ناتاليا گودۋنوۆا 2022 -جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن جاريا ەتتى.

وسىدان كەيىن ۇكىمەت مۇشەلەرى ءماجىلىس دەپۋتاتتارى تاراپىنان قويىلعان ساۋالدارعا جاۋاپ بەردى.

قورىتىندىسىندا اتالعان ەسەپتى ماقۇلداۋعا وتىرىسقا قاتىسقان 94 دەپۋتات داۋىس بەرۋى ءتيىس ەدى. دەگەنمەن، 2 دەپۋتات داۋىس بەرگەن جوق.

ال 73 دەپۋتات جاقتاپ، 12 دەپۋتات قارسى بولدى جانە 7 دەپۋتات قالىس قالدى.

«بۇگىن جان- جاقتى تالقىلاۋ بولدى. وتە ماڭىزدى ۇسىنىستار ايتىلدى. قاتتى دا اڭگىمەلەر ايتىلدى. ءبىز ۇكىمەتتىڭ ەسەبىن جىل سايىن تىڭداپ كەلە جاتىرمىز. ۇكىمەت جىلدان جىلعا بيۋدجەتتىڭ جوعارى دەڭگەيدە يگەرىلىپ جاتقانى تۋرالى ماقتانىشپەن باياندايدى. يگەرىلمەگەن قارجى بويىنشا ايتاتىن سەبەپتەرى دە جىل سايىن وزگەرمەيدى. وزگەرەتىن - تەك بايانداماشىلار جانە سۇراق قوياتىن ادامدار. ەندى ءبىز بۇل سيفرلارعا ۇكىمەتتىڭ قالاي جەتكەنىن جاقسى ءبىلىپ وتىرمىز. ول تۋرالى بۇگىن ايتىلدى. بيۋدجەت 8 رەت تۇزەتۋدىڭ جانە ءبىر رەت ناقتىلاۋدىڭ ارقاسىندا قول جەتكىزدى دەگەن اڭگىمە بۇگىن ايتىلدى. بيۋدجەت وسى ءبىر جىلدا 1 تريلليون تەڭگەگە تۇزەتىلىپتى. ەندى وسىنداي تىرناقشانىڭ ىشىندەگى تاماشا سيفردىڭ ارتىندا نە تۇر؟ ۋاقىتىلى قولدانىسقا بەرىلمەگەن 60 مەكتەپ تۇر. سونىڭ سالدارىنان ون مىڭداعان وقۋشى ءۇش اۋىسىمدا ءبىلىم الۋعا ءماجبۇر. ۇلەستىرىلمەگەن 18 مىڭ گرانت بار. مەن تەك ءبىر سالاعا عانا قاتىستى ايتىپ وتىرمىن. مۇنداي مىسالدى باسقا دا سالالاردان كوپتەپ كەلتىرۋگە بولادى» ، - دەدى ءماجىلىس ءتوراعاسى ەرلان قوشانوۆ.

ونىڭ اتاپ وتۋىنشە، مۇنىڭ ارتىندا ادامداردىڭ تاعدىرى تۇر. بۇل كورسەتكىشتەر ادامداردىڭ ءومىر ءسۇرۋ ساپاسىنا تىكەلەي اسەر ەتەدى.

«ۇكىمەت مۇشەلەرى، دەپۋتاتتار، وسىنى ەستەن شىعارماۋىمىز، ۇمىتپاۋىمىز كەرەك»، - دەدى ءماجىلىس سپيكەرى.

سوڭعى جاڭالىقتار