مۇناي كومپانيالارى نيگەريا ەكولوگياسىنا 12 ميلليارد دوللار زيان كەلتىردى
كەلتىرىلگەن شىعىن 12 ميلليارد دوللارعا باعالانىپ وتىر، دەپ حابارلايدى قازاقپارات Euronews-كە سىلتەمە جاساپ.
نيگەريا ەلدە جۇمىس ىستەيتىن ءىرى مۇناي كومپانيالارىنان ونداعان جىلدار بويى ەلدى لاستاعانى ءۇشىن اقى تولەۋدى تالاپ ەتەدى. حالىقارالىق ساراپشىلار كوميسسياسىنىڭ تەرگەۋ ناتيجەلەرى نيگەر ساعاسىنىڭ (ەلدىڭ وڭتۇستىگىندەگى نيگەر وزەنىنىڭ ساعاسىندا حالىق كوپ شوعىرلانعان ايماق) جارتى عاسىرلىق كومىرسۋتەك وندىرۋدەن تۋىنداعان ناعىز ادامي جانە ەكولوگيالىق اپاتتىڭ ساحناسىنا اينالعانىن كورسەتەدى. بۇل ايماقتاعى لاستانۋ 1989 -جىلعى الياسكا جاعالاۋىنداعى «ەكسون ۆالدەس» تانكەرىنەن مۇنايدىڭ توگىلۋىنەن 50 ەسە جوعارى.
1950 -جىلدارى مۇناي تابىلعان جانە Shell مەن Eni ونداعان جىلدار بويى جۇمىس ىستەپ كەلە جاتقان افريكاداعى بايەلسا شتاتىندا جاعداي وتە اۋىر.
«مەن بۇل ەسەپ جاعدايدى وزگەرتەدى دەپ ۇمىتتەنەمىن، ويتكەنى الەمدەگى كوپتەگەن ادامدار مۇنداي دەڭگەيدەگى زۇلىمدىقتاردىڭ نيگەر ساعاسى مەن بايەلسا شتاتىندا جاسالىپ جاتقانىن بىلمەيدى. بۇل ەسەپتە Shell, Chevron, Agip, elf جانە باسقالاردىڭ ونداعان جىلدار بويى جاسىرىپ كەلگەنى تۋرالى اقپارات اشىلادى»، - دەيدى بايەلسا شتاتىنداعى باسشىلار كەڭەسىنىڭ ءتوراعاسى رەي بۋبارايە داكولو.
تەرگەۋ مالىمەتتەرى بويىنشا، بايەلسا شتاتىنداعى قورشاعان ورتاعا كەلتىرىلگەن زياندى جويۋ نيگەريا بيلىگى مۇناي كومپانيالارى تولەۋى كەرەك دەپ سانايتىن كەم دەگەندە 12 ميلليارد دوللاردى قۇرايدى.
