اتىراۋدا 12 جاسار بالا ويىن-ساۋىق ورتالىعىندا بيىكتەن قۇلاپ جاراقاتتاندى
وقيعا كەشە، 28-ناۋرىزدا «اتىراۋ» ساۋدا-ويىن-ساۋىق ورتالىعىندا بولعان. ورتالىقتاعى بالالار الاڭىندا ويناپ جۇرگەن 12 جاسار جەتكىنشەك بيىكتەن قۇلاپ كەتكەن. بۇل دەرەكتى وبلىستىق پوليتسيا دەپارتامەنتىنىڭ باسپا ءسوز قىزمەتى راستادى. وقيعا ورنىنا جەدەل جاردەم بريگاداسى شاقىرىلعان.
«ويناپ جۇرگەن بالا ابايسىزدا 5-6 مەتر بيىكتەن قۇلاعان. ول سول اياعىنداعى توبىق بۋىنى تۇسىنان جابىق جاراقات العان. بالاعا العاشقى مەديتسينالىق كومەك كورسەتىلىپ، وبلىستىق بالالار اۋرۋحاناسىنىڭ تراۆماتولوگيا بولىمشەسىنە جەتكىزىلدى»، - دەپ حابارلادى وبلىستىق جەدەل جاردەم ستانسياسى ديرەكتورىنىڭ ورىنباسارى نارگيز بايمولدايەۆا.
وبلىستىق بالالار اۋرۋحاناسىنىڭ دارىگەرلەرى بالانىڭ دەنساۋلىعىنا مەديتسينالىق تەكسەرۋ جۇرگىزگەن. سودان كەيىن اۋرۋحاناعا جاتقىزۋدىڭ قاجەتتىلىگى تۋىنداماعاندىقتان، بالا ۇيىنە جىبەرىلگەن.
«اتالعان دەرەككە قاتىستى بالانىڭ اتا- اناسىنان ەشقانداي ارىز تۇسكەن جوق. وقيعاعا بايلانىستى جيناقتالعان ءىس قۇجاتتارى وبلىستىق مەملەكەتتىك ەڭبەك ينسپەكتسياسى باسقارماسىنا جولداندى»، - دەپ ءمالىم ەتتى دەپاراتمەنتتىڭ باسپا ءسوز قىزمەتى.
ەسكە سالا كەتەلىك، بۇعان دەيىن اتىراۋ وبلىسىندا كانال سۋىنا قۇلاعان ەكى بالانىڭ ءبىرى مەرت بولعانىن جازعان ەدىك. ولار ءبىر وتباسىنىڭ بالالارى بولىپ شىقتى. قۇرمانعازى اۋدانىنىڭ بىرلىك اۋىلدىق وكرۋگىندە تۇراتىن ءبىر وتباسىنىڭ اعالى-ءىنىلى ەكى بالاسى ويناپ ءجۇرىپ، ابايسىزدا شۋچە كانالىنىڭ شۇڭقىرىنا قۇلاپ كەتكەن. كانال سۋىنا، الدىمەن 2016 -جىلعى ءىنىسى باتقان. ونىڭ قۇلاعانىن كورگەن 10 جاسار اعاسى قۇتقارماق بولىپ، سۋعا سەكىرگەن.
