ماڭعىستاۋدا 12-بالاسىن دۇنيەگە اكەلگەن كوپبالالى انا ارنايى سۇحبات بەردى
37 جاسىندا 12 بالانىڭ اناسى اتانعان كەلىنشەك KAZ. NUR. KZ تىلشىسىنە سۇحبات بەرىپ، ومىرىندەگى ەڭ باقىتتى كەزەڭدەردى وتكەرىپ جاتقانىن ايتتى.
اينۇر جولداسى سۇندەتپەن بىرگە ماڭعىستاۋ وبلىسىندا تۇرادى. ال ءوزى جەتىسايدىڭ تۋماسى. 18 جاسىندا تۇرمىس قۇرعان كەلىنشەكتىڭ ۇلكەنى 17-دەن اسسا، ەڭ كىشى ءسابيى جاقىندا دۇنيەگە كەلدى.
«ءار بالامنىڭ اراسى 1 -1,5 جاستان. سابيلەرىمدى جوسپارلى تۇردە دۇنيەگە اكەلدىم دەي المايمىن. بارلىعىن اللا بەردى. قۇرساعىما بىتكەن ءسابيدى امان-ەسەن ومىرگە اكەلۋ ءۇشىن كۇش بەردى. اللاعا سانسىز شۇكىر. 12-بالامىزدىڭ جىنىسىن ادەيى سۇرامادىق. جۇكتى ەكەنىمدى بىلگەندە كۇيەۋىم دە قاتتى قۋانىپ، قىز بولعانىن قالادى. ۇلكەن ەكى بالام ۇل كۇتتى. وسىلايشا، ايى-كۇنى تولعان سوڭ مۇحاممەد-ءامينىمىز جارىق دۇنيە ەسىگىن اشتى. سول كەزدە ۇلدارىم قاتتى قۋاندى. ارينە، مەنىڭ 12-بالانى بوساناتىنىمدى ەستىگەن دارىگەرلەر قاتتى تاڭ قالدى.
«ءوزىڭدى جاقسى كۇتىپسىڭ، دەنساۋلىعىڭ جاقسى ەكەن. ءتورتىنشى بالاسىن بوساناتىن ايەلگە ۇقسايسىڭ»، - دەپ اق حالاتتىلار تاڭدانىسىن جاسىرمادى. ونىڭ ۇستىنە، بالالارىمنىڭ ءبارىن دە تابيعي جولمەن بوساندىم. بۇل دا قۇدايدىڭ بەرگەن كومەگى شىعار. قازىر ۇلكەن ەكى ۇلىم شارۋاشىلىققا كومەكتەسەدى. قىزدارىم ءۇي تىرلىگىنەن بوسامايدى. ءوزىم ۇيدەمىن، بالا تاربيەسى مەنىڭ موينىمدا»، - دەيدى اينۇر.
12 بالانىڭ اناسى كوپبالالى وتباسى رەتىندە الاتىن مەملەكەتتىك جاردەماقى كولەمىن دە ايتتى.
«التىن القا» مەن بالالارعا بەرىلەتىن جاردەماقىنى قوسقاندا، ۇكىمەتتەن جالپى ەسەبى 160 مىڭ تەڭگە الامىن. كوپبالالى وتباسى رەتىندە بىلتىر ارەندالىق پاتەرىمىزدى الدىق. كەزەگىمىزدى كۇتىپ، ءوز رەتىمەن يەلەندىك. پاتەرىمىزدىڭ كولەمى - 60 شارشى مەتر. ارينە، 12 بالاعا تارلىق ەتەدى. ءبىراق ءبىز ەشكىمنەن كومەك سۇراماي، ءوز كۇشىمىزبەن، بىرەۋدەن ىلگەرى، بىرەۋدەن كەيىن ءومىر ءسۇرىپ جاتقان وتباسىمىز.
بالانى تۋساق، ءوزىمىز ءۇشىن تۋدىق. مەملەكەتكە دە، جاقىن تۋىستارىمىزعا دا كۇش سالعان ەمەسپىز، ەشتەڭە دامەتپەيمىز. كۇش سالمايمىز دا. اللا وزىمىزگە قۋات بەرسىن. بالالارىم امان بولسىن. جولداسىم دانەكەرلەۋشى بولىپ جۇمىس ىستەيدى. وسى ۋاقىتقا دەيىن ءبىزدى اش قالدىرعان ەمەس. ءوزى بالا-شاعاسىن باعىپ جاتىر، مەن ولاردىڭ تاربيەسىمەن اينالىسامىن. بالالارىمنىڭ دەنى ساۋ، تاماعى توق، كيىمى ءبۇتىن. باسىمىزدا باسپانا بار. وسىدان ارتىق باقىت جوق. ءدال قازىر ءوزىمدى الەمدەگى ەڭ باقىتتى انا دەپ ەسەپتەيمىن«، - دەيدى كوپبالالى انا.
اينۇر مەن سۇندەت بۇگىندە ەردوس، نۇردوس، ءسانىم، بەرەكەت، نۇراي، نۇريسلام، زاڭعار، يسمايل، يبراحيم، ايشا، سافيا جانە مۇحاممەد-ءامين ەسىمدى 12 بالانى تاربيەلەپ وتىر. «تۋىستارىمىز مەن جاقىندارىمىز دا قۋانىشىمىزعا ورتاقتاسىپ جاتىر. ءار بالانىڭ ءوز نەسىبەسى بار، شۇكىر. بۇگىنگە دەيىن ەشكىمنەن كەم بولعان ەمەسپىز. دەنساۋلىق بولسا، قازاقتىڭ انالارى حالىق سانىن كوبەيتكەنى دۇرىس. ەڭ باستىسى - ايەلدىڭ دەنساۋلىعى جاقسى بولسىن«، - دەيدى اينۇر جۇمانبەتوۆا.
