قاڭتار وقيعاسى: 12 مىڭنان استام ادامنان جاۋاپ الىندى

نۇر- سۇلتان. قازاقپارات - قىلمىستىق ىستەر بويىنشا 1,5 مىڭنان اسا جەكە جانە زاڭدى تۇلعالار جابىرلەنۋشى دەپ تانىلدى.

بۇل تۋرالى ءى ءى م تەرگەۋ دەپارتامەنتىنىڭ باستىعى سانجار ءادىلوۆ ايتتى، دەپ حابارلايدى قازاقپارات ءتىلشىسى.

«ىشكى ىستەر مينيسترلىگى قاڭتار وقيعالارىن تەرگەۋ مەن ەلدەگى قۇقىقتىق ءتارتىپتى قامتاماسىز ەتۋ بويىنشا جۇمىستى جالعاستىرۋدا. قازىرگى ۋاقىتتا ىشكى ىستەر ورگاندارى تەرگەۋشىلەرىنىڭ قاراۋىندا 2729 قىلمىس ءىس بار، ولار بويىنشا 255 ادام كۇزەتپەن ۇستالۋدا. سونىمەن بىرگە جاساعان ارەكەتىنىڭ اۋىرلىعىن، جەكە باسىنىڭ مىنەزدەمەسىن ەسكە وتىرىپ، سوتتار 140 ادامعا قوعامنان الشاقتاتۋعا بايلانىستى ەمەس بۇلتارتپاۋ شارالارىن تاعايىندادى:

ءۇيقاماق - 62، كەپىل - 33، ەشقايدا شىقپاۋ تۋرالى قولحات - 45. بۇرىن اتالعانداي قىلمىستىق ىستەردىڭ نەگىزگى بولىگى كەلەسى قىلمىستار بويىنشا تەرگەلۋدە: ۇرلىق - 1844، قارۋدىڭ زاڭسىز اينالىمى - 343، مۇلىكتى قاساقانا ءبۇلدىرۋ نەمەسە جويۋ - 144»، - دەدى سانجار ءادىلوۆ ورتالىق كوممۋنيكاتسيالار قىزمەتىندە.

ونىڭ ايتۋىنشا، قىلمىستىق ىستەر بويىنشا 1,5 مىڭنان اسا جەكە جانە زاڭدى تۇلعالار جابىرلەنۋشى دەپ تانىلدى.

«12 مىڭنان استام ادامنان جاۋاپ الىنعان، 2 مىڭنان استام ءارتۇرلى سوت ساراپتامالارى تاعايىندالعان. سوتقا دەيىنگى تەرگەۋدىڭ ساپاسىنا جانە ونىڭ جەدەل اياقتالۋى ەرەكشە نازارعا الىنعان»، - دەدى س. ءادىلوۆ.

اۆتور: رۋسلان عابباسوۆ