بيىل پوليتسەيلەر 12 توننا ەسىرتكى تاركىلەدى - ءى ءى م

نۇر- سۇلتان. قازاقپارات - جىل باسىنان بەرى ىشكى ىستەر ورگاندارىنىڭ قىزمەتكەرلەرى 5300 ەسىرتكى زاڭبۇزۋشىلىعىن انىقتادى جانە 12,5 توننا ءارتۇرلى ەسىرتكى تاركىلەدى، دەپ حابارلايدى قازاقپارات ءتىلشىسى.

«جىل باسىنان بەرى ىشكى ىستەر ورگاندارىنىڭ قىزمەتكەرلەرى 5300 ەسىرتكى زاڭبۇزۋشىلىعىن انىقتادى، ونىڭ ىشىندە 1661 قىلمىستىڭ 991- ءى اسا ءىرى كولەمدە ەسىرتكىنى وتكىزۋ جانە 270- ءى - ساقتاۋ فاكتىسى بولعان. جالپى سالماعى 12,5 توننا ءارتۇرلى ەسىرتكى تاركىلەندى، ونىڭ ىشىندە: 4 ك گ گەروين، 129 ك گ سينتەتيكا، 371 ك گ گاشيش جانە 8,7 توننا ماريحۋانا بار»، - دەدى ق ر ءى ءى م ەسىرتكى قىلمىسىنا قارسى ءىس- قيمىل دەپارتامەنتىنىڭ باسقارما باستىعى باقىتجان ءامىرحانوۆ مينيسترلىك ۇيىمداستىرعان بريفينگتە.

ونىڭ ايتۋىنشا، 24- تامىزدا جامبىل وبلىسى شۋ اۋدانىندا بايزاق اۋدانىنىڭ 49 جاستاعى تۇرعىنى جالپى سالماعى 928 ك گ كاننابيس وسىمدىكتەرىن دايىنداۋ كەزىندە ۇستالعان. سونداي- اق، 7 ۇيىمداسقان قىلمىستىق توپ تاراتىلىپ، ولاردىڭ باسشىلارى مەن قاتىسۋشىلارىنا قاتىستى 13 قىلمىستىق ءىس قوزعالدى. قىلمىستىق توپتاردىڭ 7 كوشباسشىسى مەن 34 قاتىسۋشىسى جاۋاپقا تارتىلادى.

«ەسىرتكى كونترابانداسىنىڭ 81 فاكتىسى انىقتالدى. مىسالى، قاراعاندى وبلىسىندا ۇيىمداسقان قىلمىستىق توپ قىزمەتىنىڭ جولى كەسىلدى، 2020 -جىلعى تامىزدان باستاپ ينتەرنەت- رەسۋرستار ارقىلى سينتەتيكالىق ەسىرتكىلەردى بايلانىسسىز وتكىزۋمەن اينالىسقان جەتەكشى مەن 7 ادام ۇستالدى. قىلمىستىق توپقا قاتىستى ق ر ق ك 297، 262-باپتارى 1 جانە 2-بولىمدەرى بويىنشا، سونداي- اق ق ر ق ك 264-بابى «ترانسۇلتتىق ۇيىمداسقان قىلمىستىق توپ» بويىنشا حالىقارالىق قىلمىستىق بايلانىستارى بويىنشا دا قىلمىستىق ىستەر قوزعالدى»، - دەيدى ب. ءامىرحانوۆ.

ۆەدومستۆونىڭ مالىمەتىنشە، 7- تامىزدا جەدەل- ىزدەستىرۋ شارالارى ارقىلى 37 جاستاعى ازامات ۇستالدى، ونى جەكە ءتىنتۋ كەزىندە 2 پاكەت «گاشيش» تاركىلەنگەن.

«قىزمەتتىك- ىزدەستىرۋ يتىمەن ءتىنتۋ بارىسىندا ۇستالعان ادامنىڭ تۇرعىلىقتى جەرى - قوسشى قالاسىندا سالماعى 34 كەلىدەن اساتىن «گاشيش» سالىنعان 2 پوليەتيلەن پاكەت تاركىلەندى. ۇستالعان ازامات تاركىلەنگەن ەسىرتكىنى استانا اۋماعىندا وتكىزۋدى كوزدەگەن. جۇرگىزىلگەن ارنايى وپەراتسيانىڭ ناتيجەسىندە 36 كيلوگرامنان استام «گاشيش» زاڭسىز اينالىمنان الىندى، بۇل 73 مىڭنان استام ءبىر رەتتىك دوزانى قۇرايدى»، - دەدى ءى ءى م باسقارماسىنىڭ باستىعى.

اۆتور: ايجان سەرىكجان قىزى