گەرمانيادا 12 جاستان اسقان جاسوسپىرىمدەردى ۆاكسينالاۋ باستالدى
نۇر- سۇلتان. قازاقپارات - گەرمانيادا ەندى COVID-19-عا قارسى ۆاكسينانى قىزمەتىنە نە جاسىنا قاراماستان كەز كەلگەن ازامات الا الادى، دەپ حابارلايدى «حابار 24».
الايدا ازىرگە ءۇش ايماقتا عانا وسال توپتاردى ەگۋ جۇرگىزىلىپ جاتىر. گەرمانيادا كوروناۆيرۋسقا قارسى جاسى 12-گە تولعان بالالاردى دا ۆاكسينالاۋ باستالدى. شارا ەرىكتى تۇردە جۇرگىزىلىپ جاتىر. جاسوسپىرىمدەردى تەك BioNTech- Pfizer ۆاكسيناسىمەن ەگەتىن بولادى. حالىق اراسىندا جۇرگىزىلگەن ساۋالناماعا قاتىسقان اتا- انالاردىڭ جارتىسى بالالارىن ەگۋدى قالايتىنىن ايتقان.
ۆانەسسا، وقۋشى:
- مەن ءوزىمدى ەرەكشە سەزىنەمىن. سەبەبى دوستارىمنىڭ ءالى بىردە بىرەۋى ۆاكسينا سالدىرعان جوق. ءبىراق ءبىر جاعىنان بۇل جاقسى. ويتكەنى ەندى كوروناۆيرۋس جۇقتىرام دەپ قورىقپاۋىما بولادى.
وسى اپتادان باستاپ ەۋرووداقتا حالقى ەڭ كوپ سانالاتىن گەرمانيادا جاپپاي ۆاكسينالاۋ باستالدى. ءبىراق ۆاكسينالاۋ ورتالىقتارىندا بيلىك كۇتكەندەي ۇزىن- سونار كەزەكتەر جوق. ەكپە الاتىندار تەلەفون اراقىلى الدىن الا جازىلۋى ءتيىس. جالپى ەلدە قازىرگە دەيىن حالىقتىڭ % 20- ءى ۆاكسينالانعان. بۇل 17 ميلليوننان استام ادام. تاعى 38 ميلليون تۇرعىن ەكپەنىڭ ءبىرىنشى دوزاسىن سالدىرعان. الداعى ۋاقىتتا ۆاكسينالاۋ ناۋقانى كۇشەيۋى مۇمكىن. شاراعا ءوندىرىس ورىندارىندا بەكىتىلگەن 6 مىڭ دارىگەر جۇمىلدىرىلماقشى. ولار قىزمەتكەرلەردى جۇمىس ورنىندا ۆاكسينالايتىن بولادى.
پەتەر التمايەر، گەرمانيا ەكونوميكا ءمينيسترى:
- بۇگىن ۆاكسينالاۋ باعدارلاماسىنا كاسىپورىندارداعى 6 مىڭ دارىگەر قوسىلادى. وسىلايشا، ولاردىڭ كومەگىمەن ءبىر ايدا تاعى 3 ميلليون ادام ەگىلەدى. بۇل - پاندەميامەن كۇرەستەگى ءىرى قادام. ءبىز وسى جازدا كەز كەلگەن ادام ۆاكسينا العانىن قالايمىز. وندىرىستەردەگى جۇمىسشىلاردى ەگۋ ماڭىزدى. وسى اپتادا گەرمانياعا 6,5 ميلليون دوزا ۆاكسينا اكەلىنۋى كەرەك.
بيلىك تۇرعىنداردىڭ ءبارىن ەگەتىنىن ايتادى. ال دەنساۋلىق ساقتاۋ مينيسترلىگى شىلدەنىڭ ورتاسىنا دەيىن ەلدەگى ەگدە ادامداردىڭ % 80- ءى ۆاكسينانىڭ ءبىرىنشى دوزاسىن الادى دەپ بولجاپ وتىر.
