قارۋلى كۇشتەردە 12 مىڭنان استام ادام كورونوۆيرۋسقا قارسى ۆاكسينالاندى

بۇل تۋرالى قورعانىس مينيسترلىگىنەن ءمالىم ەتتى، دەر حابارلايدى قازاقپارات.

بۇگىن قورعانىس مينيسترلىگىندە وتكەن اپپارات كەڭەسىندە ەل اسكەرىنىڭ تىنىس-تىرشىلىگىنە قاتىستى وزەكتى ماسەلەلەر قارالدى.

كەڭەستە، «قالقان-2021» جەدەل-تاكتيكالىق وقۋ-جاتتىعۋىنىڭ قورىتىندىلارى باياندالىپ، وندا قارۋلى كۇشتەردىڭ، شەكارا قىزمەتىنىڭ جانە ۇلتتىق ۇلاننىڭ مەملەكەتتىك شەكارانى كۇشەيتۋ جونىندەگى بىرلەسكەن پراكتيكالىق ءىس-قيمىلدارى العاش رەت پىسىقتالعان بولاتىن.

قورعانىس ءمينيسترى نۇرلان ەرمەكبايەۆ بۇل رەتتە، وقۋ-جاتتىعۋ ناتيجەلەرىن تالداۋ نەگىزىندە اسكەرلەردى جاۋىنگەرلىك جانە جەدەل دايارلاۋ ۇردىسىنە مانيەۆرلەر بارىسىندا تيىمدىلىك كورسەتكەن تاجىريبەنى ەنگىزۋگە نۇسقاۋ بەردى.

قىسقى وقۋ كەزەڭىنىڭ اياقتالۋىنا بايلانىستى پوليگوندار مەن وقۋ الاڭدارىن وق-دارىلەر قالدىقتارىنان تازارتۋ باس قولباسشىلارعا، قولباسشىلارعا تاپسىرىلدى.

بۇدان وزگە، قارۋ-جاراق پەن اسكەري تەحنيكانى جازعى پايدالانۋ رەجيمىنە اۋىستىرۋدى ۋاقتىلى ورىنداۋ قاجەتتىگى جانە بۇل ءىس-شارالار جازعى وقۋ كەزەڭىنە قاراي اياقتالۋى تيىستىگى ايتىلدى.

اسكەرگە شاقىرۋ ناۋقانىن جالعاستىرۋ بارىسىندا سونداي-اق، بارلىق سانيتارلىق-ەپيدەميولوگيالىق شارالاردىڭ ساقتالۋىنا نازار اۋدارىلدى.

بۇل شارالار اسكەرگە باراتىنداردى ىرىكتەيتىن جەرگىلىكتى اسكەري باسقارۋ ورگاندارىنا دا، جاس ساربازدار كەلگەن سوڭ كارانتيندىك ءىس-شارالار جۇزەگە اسىرىلۋى ءتيىس اسكەري بولىمدەرگە دە قاتىستى. سونداي-اق باس اسكەري مەديتسينالىق باسقارمانىڭ باستىعى جەكە قۇرامعا جۇرگىزىلگەن ەكپە جونىندە جەتكىزدى.

19-ساۋىردەگى جاعداي بويىنشا 12 مىڭنان استام اسكەري قىزمەتشى مەن قارۋلى كۇشتەردىڭ ازاماتتىق پەرسونال وكىلدەرى كوروناۆيرۋسقا قارسى ەكپە سالدىردى.