قازاقپارات كۇنتىزبەسى: 12- اقپان
اتاۋلى كۇندەر
حالىقارالىق عىلىم جانە گۋمانيزم كۇنى (دارۆين كۇنى)
اعىلشىننىڭ بەلگىلى ناتۋراليست عالىمى چارلز ءدارۆيننىڭ تۋعان كۇنىنە وراي جىل سايىن تويلانادى. عالىمنىڭ تابيعي سۇرىپتالۋ تەورياسى، ەۆوليۋتسيالىق تەورياسى كوزى تىرىسىندە-اق عىلىمي توڭكەرىس جاسادى دەپ باعالاندى.
قىزىل قول تاڭبالارى كۇنى
اتاۋلى كۇن ساياسي قايراتكەرلەر مەن جۇرتشىلىق نازارىن سوعىس بالالارىنا اۋدارۋ ماقساتىندا اتالىپ وتەدى.
2002 -جىلدىڭ 12- اقپانىندا بالالار قۇقىقتارى تۋرالى كونۆەنتسياعا قوسىمشا تۇردە قابىلدانعان قارۋلى قاقتىعىستارعا تارتىلعان بالالارعا قاتىستى فاكۋلتاتيۆتىك حاتتاما كۇشىنە ەندى.
2008 -جىلى الەمدە بالالار مەن جاسوسپىرىمدەر قىزىل قول تاڭبالارىن جيناۋ ناۋقانىن باستادى. 250 مىڭنان استام بالا قولىنىڭ تاڭباسى جينالىپ، ب ۇ ۇ باس حاتشىسى پاك گي مۋنعا 2009-جىلدىڭ 12- اقپانىندا تاپسىرىلدى.
ونى كولۋمبيا مەن كوت- د'يۆۋاردا سوعىستارعا قاتىسقان اسكەري بالالار مەن گەرمانيانىڭ جاس بەلسەندىلەرى تاپسىرىپ، اسكەر رەتىندە بالالاردى پايدالانۋدى توقتاتۋعا ۇندەدى.
ەستە قالار وقيعالار
1955-جىلى قىزىلوردا وبلىسىندا بايقوڭىر عارىش ايلاعىن سالۋ تۋرالى شەشىم قابىلداندى. 6717 شارشى شاقىرىم اۋماقتى الىپ جاتىر. وسى عارىش ايلاعىنان العاشقى جاساندى سپۋتنيك جانە تۇڭعىش عارىشكەر يۋري گاگارين ۇشىرىلدى.
1992 -جىلى الماتىدا قازاقستان رەسپۋبليكاسى مەن اۋعانستان رەسپۋبليكاسى اراسىندا ديپلوماتيالىق قارىم-قاتىناس ورناتۋ تۋرالى حاتتاماعا قول قويىلدى.
1994 -جىلى نورۆەگيانىڭ ليلەحاممەر قالاسىندا وتكەن XVII قىسقى ويىندارعا تاۋەلسىز قازاقستان قۇراماسى العاش رەت قاتىستى.
2001 -جىلى پاۆلوداردا ⅩⅩ عاسىردىڭ باسىندا العاشقى جارىقپەن سۋرەت سالۋ سالونىن اشقان دميتري باگايەۆتىڭ مۋزەي-ءۇيى اشىلدى. ول تۇسىرگەن سۋرەتتەر ارقىلى قازىرگى ۇرپاق وتكەن عاسىردىڭ باس كەزىندەگى قازاق تۇرمىسى تۋرالى قۇندى دەرەكتەرگە يە بولىپ وتىر.
2007 -جىلى ۇلتتىق بانكتىڭ ورتالىق فيليالىنا نومينالى 500 تەڭگەلىك ەكى كوللەكتسيالىق كۇمىس شاقا كەلىپ ءتۇستى. شاقالاردىڭ دايىندالۋ ساپاسى - «proof»، تيراجى - 4 مىڭ دانا. ءبىرىنشى شاقادا - بالاسىن بەسىككە بولەپ جاتقان انا بەينەلەنسە، ەكىنشىسىندە - الماتىداعى ورتالىق مەشىت بەينەلەنگەن. كوللەكتسيالىق شاقانىڭ سالماعى - 31,1 گرام، ديامەترى - 38,61 م م. ءارقايسىسىنىڭ قۇنى 5 مىڭ تەڭگە. شاقالار 925-سىنامالى كۇمىستەن جاسالعان.
2014 -جىلى قىزىلقۇم شولەيتىندە شىمكەنتتىك ارحەولوگتار XVIII عاسىر باتىرلارىنىڭ ساۋىتىن تاپتى. كەزدەيسوق جادىگەر جايلى ارحەولوگتارعا جەرگىلىكتى تۇرعىندار ايتقان. تاريحشىلار العاش رەت ءۇش عاسىر بۇرىن قازاقتار جوڭعارلارمەن قالاي ايقاسقانى تۋرالى دەرەكتى دالەل تاپتى. دۋلىعا، ساۋىت، جامىلعىلار ۇقىپتى شەشىلىپ، ارنايى ساقتاۋ ءۇشىن قويعانداي ەتىپ ورنالاستىرىلعان.
2015 -جىلى «قازاقستان عارىش ساپارى» ۇلتتىق كومپانياسى» ا ق سەرىكتىك ناۆيگاتسيالىق اپپاراتۋرانىڭ سايكەستىكتى باعالاۋ زەرتحاناسىن (س ب ز) قۇرۋ بويىنشا جۇمىستاردى اياقتادى، ونىڭ كومەگىمەن سنا مەترولوگيالىق سيپاتتاماسى جۇرگىزىلەدى. ناۆيگاتسيالىق جانە جيىلىك-ۋاقىتشا پارامەترلەردىڭ كەمشىلىكتەرىن ولشەيدى. تەڭىزدە، قۇرىلىقتا، اۆياتسيادا، عارىشتا، گەودەزيادا جانە باسقا دا ارنايى قولدانۋ سالاسىندا سنا تەحنيكالىق مۇمكىندىكتەرىن ايقىندايدى.
2015 -جىلى Toshiba International (جاپونيا) قورى ءال-فارابي اتىنداعى قازاق ۇلتتىق ۋنيۆەرسيتەتىنىڭ عىلىمي كىتاپحاناسىنا تەڭدەسسىز بەزەمە جيىنتىعىن بەردى. قۇندى دۇنيەنى سىيلاۋ قاز ۇ ۋ شىعىستانۋ فاكۋلتەتىنىڭ وڭتۇستىك ازيا جانە قيىر شىعىس كافەدراسىنىڭ قورمەن سەرىكتەستىگى اياسىندا جۇزەگە استى. سىيلىق - ەدو داۋىرىندەگى تانىمال جاپوندىق ۋكيە-ە جيىنتىعى (1600-1868)، سونىمەن قاتار وعان ۋكيە-ە تۋرالى اقپارات بەرەتىن ۆيدەوماتەريالدار مەن كىتاپتار جيىنتىعى كىرەدى.
2016 -جىلى باكۋ قالاسىندا قازاقستان رەسپۋبليكاسىنىڭ ازەربايجان رەسپۋبليكاسىنداعى ەلشىلىگىنىڭ جاڭا عيماراتىندا ەلىمىزدىڭ مەملەكەتتىك تۋى سالتاناتتى تۇردە كوتەرىلدى. ەلشىلىكتىڭ جاڭا عيماراتى قازاقستاننىڭ شەتەلدەردەگى ديپلوماتيالىق وكىلدىكتەرىنىڭ، سونداي-اق ازەربايجاندا اككرەديتتەلگەن شەتەلدىك ديپلوماتيالىق كەڭسەلەردىڭ اراسىنداعى ەڭ سۇلۋ عيماراتتاردىڭ ءبىرى. ەلشىلىك عيماراتى باكۋ قالاسىنىڭ حاتاين اۋدانىندا ورنالاسقان. جالپى 0,5 گەكتار اۋماقتى الىپ جاتىر، عيمارات پەن ەلشىلىك قىزمەتكەرلەرىنە ارناپ سالىنعان تۇرعىن كەشەنىنىڭ جالپى اۋدانى 7000 شارشى مەتردەن اسادى.
2016 -جىلى ش. ايمانوۆ اتىنداعى «قازاق فيلم» ا ق شىعارعان رەجيسسەر ەرلان نۇرمۇحامبەتوۆتىڭ «جاڭعاق اعاشى» فيلمى فرانسيانىڭ ۆەزۋل قالاسىندا وتكەن XXII حالىقارالىق ازيا كينوسى فەستيۆالىنىڭ نەگىزگى كونكۋرس باعدارلاماسىندا كورسەتىلىپ، بىردەن ەكى جۇلدەنى: حالىقارالىق قازىلار القاسىنىڭ جانە كينوسىنشىلاردىڭ ارنايى سىيلىقتارىن جەڭىپ الدى.
«جاڭعاق اعاشىنا» قىتاي، جاپونيا، وڭتۇستىك كورەيا، يران، فيليپپين جانە تۇركيا ەلدەرىنەن ۇسىنىلعان 8 فيلم باسەكەلەس بولدى. جالپى، فەستيۆال اياسىندا ءارتۇرلى باعدارلامالار بويىنشا 90 نان استام فيلم كورسەتىلدى.
2020 -جىلى «ولگا رىپاكوۆا» جەڭىل اتلەتيكا ورتالىعىندا جەڭىل اتلەتيكادان 16 جاسقا دەيىنگى جاس ءوسپىرىم ۇلدار مەن قىزدار اراسىنداعى قازاقستان رەكوردى جاڭاردى. شىعىس قازاقستان جەڭىل اتلەتيكا مەكتەبىنىڭ تاربيەلەنۋشىسى ارينا گلادىشيەۆا قازاقستان چەمپيوناتىندا ەڭ جوعارى كورسەتكىش كورسەتىپ، جاڭا رەكورد ورناتتى. 1500 مەترگە جۇگىرۋدە جاس سپورتشى 4:34.04 ناتيجەسىن كورسەتتى. بۇعان دەيىنگى جوعارى كورسەتكىش1987-جىلدان بەرى جاڭارتىلماعان.
2020 -جىلى انكارادا قازاقتىڭ ۇلى اقىنى، اعارتۋشىسىنىڭ تۋعانىنا 175 جىل تولۋىنا وراي تۇركسوي حالىقارالىق تۇركى مادەنيەتى ۇيىمى جاريالاعان «اباي جىلىنىڭ» اشىلۋى ءوتتى.
2020 -جىلى شۆەيتساريادا قازاقتىڭ ۇلى اقىنى ابايدىڭ 175 جىلدىعىنا جانە تۇركى فيلوسوفى ءابۋ ناسىر ءال-فارابيدىڭ 1150 جىلدىعىنا ارنالعان مەرەيتويلىق پوشتا ماركالارى شىعارىلدى.
شۆەيتساريادا حالىقارالىق فيلاتەليالىق كورمەلەر بىرنەشە رەت وتكەن بولاتىن. اتالعان مەملەكەتتىڭ پوشتاسى مەن پوشتا ماركالارى ەلدىڭ باستى برەندتەرى سانالادى. SwissPost ماركالارى كوللەكتسيونەرلەر مەن تۋريستەر اراسىندا وتە تانىمال. ال بۇل كومپانيانىڭ حات اينالىمى جىلىنا 2 ميلليارد حاتقا دەيىن جەتەدى.
