الماتىدا قاۋىپتى قىلمىسكەردىڭ ارتىنان 12-قاباتتان سەكىرگەن پوليتسەي ماراپاتتالدى
«بۇگىن ارىپتەسىمىز باقىتجان باكىروۆتى ىشكى ىستەر ءمينيسترى ەرلان تۇرعىمبايەۆ «قۇقىق ءتارتىبىن قامتاماسىز ەتۋدە قوسقان ۇلەسى ءۇشىن» مەدالىمەن ماراپاتتادى. ءبىز ونىڭ ۇيىنە بارىپ، حال- جاعدايىن ءبىلىپ، تەزىرەك ساۋىعىپ كەتۋىن تىلەدىك. قىزمەتكە بەرىلگەن وسىنداي جانقيارلىقتى ۇلگى ەتە وتىرىپ ءبىز پوليتسياداعى جاس قىزمەتكەرلەرگە تاربيە بەرەمىز جانە ازاماتتاردىڭ تىنىشتىعى مەن قاۋىپسىزدىگىن ساقتاۋدا ناعىز كاسىبي ارەكەت قالاي جاسالاتىنىن ناقتى مىسال رەتىندە كورسەتەمىز. مايور باكىروۆكە ريزاشىلىعىمدى بىلدىرەمىن. وسىنداي ۇلدى تاربيەلەپ وسىرگەن اتا- اناسىنا ەرەكشە العىس ايتامىن»، - دەدى الماتى قالالىق پوليتسيا دەپارتامەنتىنىڭ باستىعى قانات تايمەردەنوۆ.
سونىمەن قاتار، مينيستر جانە پ د باسشىسى تۇركسىب اۋداندىق پ ب جانىنداعى پوليتسيا ءبولىمىنىڭ تاعى جەتى قىزمەتكەرىن ماراپاتتادى، ولاردىڭ ارقاسىندا بالانى قورلاعان اسا قاۋىپتى قىلمىسكەر لايىقتى جازاسىن الادى.
ەستەرىڭىزگە سالا كەتەيىك، قىلمىس 11-شىلدەدە تۇركسىب اۋدانىندا جەكە ۇيلەر الابىندا بولعان. تۇستە كۇدىكتى پوكروۆسكايا كوشەسىندە ورنالاسقان ۇيلەردىڭ بىرىنە كىلتتى تاڭداۋ ارقىلى كىرگەن. ۇيدە 2 بالا - ءتورت جاستاعى ۇل بالا مەن ونىڭ 15 جاستاعى اپكەسى بولعان. قاسكوي پىشاقپەن قورقىتىپ، 17 مىڭ دوللاردى يەمدەنىپ، سودان كەيىن قىزدى قورلاعان. كەيىن ءال-فارابي داڭعىلىنداعى ۇيدە جاسىرىنعان كۇدىكتى پوليتسيادان قاشىپ 12-قاباتتان سەكىرىپ كەتكەن. سول كەزدە مايور باقىتجان باكىروۆ ونىڭ ارتىنان بىرگە سەكىرىپ، قىلمىسكەردى قۋىپ جەتكەن.
