ءۇندىستاندا وگىز 12 ادامنىڭ ولىمىنە سەبەپشى بولدى

نيۋ- دەلي. قازاقپارات - ءۇندىستاننىڭ رادجاستان شتاتىندا جان تۇرشىگەرلىك جول اپاتىنان 12 ادام قازا تاۋىپ، تاعى 10-ى زارداپ شەكتى، دەپ حابارلايدى قازاقپارات 18news.com-عا سىلتەمە جاساپ.

قولدا بار دەرەكتەرگە قاراعاندا، تاڭەرتەڭ لاتۋرادان قيسارعا بارا جاتقان شاعىن اۆتوبۋس جۇرگىزۋشىسى كەنەتتەن پايدا بولعان وگىزدى قاعىپ كەتپەۋ ءۇشىن كولىكتى شۇعىل بۇرىپ جىبەرگەن. سالدارىنان رۋلگە يە بولا الماي قالىپ، جولدى ءبولىپ تۇراتىن بوگەتكە سوعىلعان.

اپات سالدارىنان 12 ادام، سونىڭ ىشىندە بەس ايەل جانە ءبىر بالا ءتىل تارتپاي كەتكەن. پوليتسيا زارداپ شەككەن ءتورت ادام دجايپۋر اۋرۋحاناسىنا، قالعان التاۋى ناگاۋراداعى اۋرۋحاناعا جاتقىزىلعانىن ءمالىم ەتتى.