ۇيدە 12 جاسقا تولماعان بالاسىن قاراۋسىز قالدىرعان اتا- انا جازالانۋى مۇمكىن

استانا. قازاقپارات - 12 جاسقا تولماعان بالالارىن ۇيدە قاراۋسىز قالدىرعان اتا- انالاردى جازالاۋ قاجەت. مۇنداي ۇسىنىستى بۇگىن ماجىلىستە قازاقستاننىڭ بالا قۇقىقتارى جونىندەگى ۋاكىلى رەتىندە اتقارعان جۇمىسى جايىندا بايانداعان زاعيپا باليەۆا ايتتى، دەپ حابارلايدى قازاقپارات ءتىلشىسى.

«قازىرگى ۋاقىتتا جۇمىس توبى اتا- انالاردىڭ 12 جاسقا تولماعان بالالارىن قاراۋسىز قالدىرۋعا قۇقىعى بولمايتىندىعىن كوزدەيتىن نورما ازىرلەپ جاتىر. ەگەر ول 12 جاسقا تولماسا ءتىپتى ۇيدە دە جالعىز قالا المايدى»، - دەدى ول.

وسى رەتتە زاعيپا باليەۆا ءىس جۇزىندە جوق قامقورشى ورگاندى كۇشەيتۋدى ۇسىندى. ونىڭ ايتۋىنشا، قامقورشى ورگانى دەپ اتالعانىمەن ول ءبىلىم بەرۋ دەپارتامەنتىندەگى ءبىر ادام عانا. وعان سول قامقورشى قىزمەتى جۇكتەلگەن.

سونىمەن قاتار بالالار ومبۋدسمەنى ەلىمىزدە بالالارعا كورسەتىلەتىن زورلىق- زومبىلىققا زاڭمەن تىيىم سالۋ قاجەتتىگىن باسا ايتتى.

«بالالارىمىزدى قورعايتىن بىردە- ءبىر زاڭىمىزدا زورلىق- زومبىلىققا تىيىم جوق ەكەنىن ويلانىڭىزدار. بالانى ولتىرگەنى، سوققىعا جىققانى ءۇشىن عانا قىلمىستىق جاۋاپكەرشىلىكتى كوزدەيتىن باپ قانا بار. ءبىز ازىرلەپ جاتقان زاڭنامادا كەمسىتۋشىلىك دەگەنىمىز نە، زورلىق- زومبىلىقتى شەكتەۋ، اتا- انا جاۋاپكەرشىلىگىن كوتەرۋ سىندى ماسەلەلەر بولادى»، - دەدى زاعيپا باليەۆا.

 ايتا كەتەرلىگى، قازاقستاننىڭ بالا قۇقىقتارى جونىندەگى ۋاكىلى ەلىمىزدە بالالار سۋدياسى، پروكۋرورى مەن تەرگەۋشىسى ينستيتۋتىن ەنگىزۋ ماسەلەسى پىسىقتالىپ جاتقانىن ايتتى.

 سونداي- اق زاعيپا باليەۆا دەپۋتاتتاردىڭ الدىنا سۋيتسيدتەن قۇتقارىلعان قىزدى الىپ كەلدى. بەتپەردە كيگەن قىز ماجىلىسمەندەرگە ءوزىنىڭ تاعدىرى تۋرالى ايتىپ بەردى.

فوتو: cdn.regenbogen.de

اۆتور: مارلان جيەمباي