قاراعاندىدا وتكەن مەرەكەلىك شەرۋگە 12 مىڭ ادام قاتىستى
مەرەكە بۇقار جىراۋ داڭعىلىنىڭ بويىنداعى سالتاناتتى شەرۋدەن باستالدى. وعان 12 مىڭ ادام قاتىستى.
الدىڭعى قاتاردا قاراعاندى وبلىسىنىڭ اكىمى ەرلان قوشانوۆ باستاعان ەتنومادەني بىرلەستىكتەردىڭ وكىلدەرى ءجۇردى. شەرۋ ورتالىق ساياباق ماڭىنداعى جاعالاۋدا اياقتالدى. وندا كۇنى بويى بۇقارالىق مەرەكەلىك شارالار ءوتىپ جاتقان بولاتىن.
شەرۋدەن سوڭ مەرەكە تەاترلاندىرىلعان كورىنىسكە ۇلاستى.
ساحنادان وبلىس تۇرعىندارىن مەرەكەلەرىمەن ءوڭىر باسشىسى قۇتتىقتادى.
«بۇگىن ءبىز بەيبىتشىلىك پەن دوستىقتىڭ باستى مەرەكەسى - قازاقستان حالقىنىڭ بىرلىگى كۇنى مەرەكەسىن اتاپ وتۋدەمىز. بۇگىنگى مەرەكەلىك شەرۋگە 12 مىڭ ادام قاتىستى. ونىڭ دا ءجونى بار. ءبىز ەلدىڭ ەڭ پوليەتنيكالىق وڭىرلەرىنىڭ بىرىندە تۇرامىز. بارلىقتارىڭىزدى بىرلىك كۇنىمەن قۇتتىقتايمىن. مەن سىزدەردەن كۇندەلىكتى كۇيبەڭ تىرشىلىكتىڭ بارىسىندا مىناۋ الەمنىڭ قانشالىقتى نازىك ەكەنىن، سول سەبەپتى ونى كوزدىڭ قاراشىعىنداي ساقتاۋ قاجەتتىگىن ۇمىتپاۋدى سۇرايمىن. ءبىزدىڭ اتا- بابالارىمىز بىرلىك جوق جەردە، تىرلىك جوق دەگەن بولاتىن. سول سەبەپتى مەن سىزدەردى بولاشاق ىستەرىمىزدى دوستىق قارىم-قاتىناستا جۇزەگە اسىرۋعا شاقىرامىن!»، - دەدى ەرلان قوشانوۆ.
وبلىس اكىمى سونىمەن قاتار قازاقستان حالقى اسسامبلەياسىنىڭ XXVI سەسسياسىندا ليتۆا ەتنومادەني بىرلەستىگىنىڭ جەتەكشىسى، جەرلەس ۆيتالي يونو تۆاريوناستىڭ ەلباسى باسقاراتىن قازاقستان حالقى اسسامبلەياسى ءتوراعاسىنىڭ ورىنباسارى بولىپ سايلانعانىن ايتىپ ءوتتى.
«العاش رەت قاراعاندى تۇرعىنى وسى قۇرمەتتى لاۋازىمعا لايىقتى دەپ تانىلدى. بۇل بۇكىل وبلىستىڭ اسسامبلەياسىنىڭ جۇمىسىنىڭ وڭ جولعا قويىلعاندىعىنىڭ كورىنىسى»، - دەدى ەرلان قوشانوۆ.
وندا مەرەكەگە جينالعان قاۋىمعا «سارى ارقا سارىندارى»، «حوروۆود درۋجبى» حورەوگرافيالىق كومپوزيسيالارى ۇسىنىلدى.
ەتنومادەني بىرلەستىكتەردىڭ انشىلەرى مەن بيشىلەر ۇجىمى قازاقستاندى تۇراتىن حالىقتاردىڭ ۇلتتىق كيىم ۇلگىلەرىمەن شىعىپ، ونەر كورسەتتى.
دوستىقتىڭ بەلگىسى رەتىندە اسپانعا 1 مىڭ شار ۇشىرىلدى.
