قازاقستاننان قىتايعا 12 ميلليون توننا مۇناي تاسىمالداندى - باس كونسۋل
بۇل تۋرالى بۇگىن جۋرناليستەرمەن كەزدەسكەن قىتايدىڭ الماتىداعى باس كونسۋلى چجانۆەي ايتتى، دەپ حابارلايدى قازاقپارات ءتىلشىسى.
چجان ۆەي مۇناي تاسىمالداۋ ارقىلى قازاقستان قازىناسىنا تۇسكەن سالىقتى دا ساناپ بەردى.
«قازاقستان مەن قىتاي اراسىنداعى مۇناي- گاز قۇبىرىنىڭ قازاقستانداعى 7600 شاقىرىمى 8000 ادامدى جۇمىسپەن قامتاماسىز ەتىپ وتىر. 2017 -جىلى بارلىعى 44 ميلليارد تەكشە مەتر گاز بەن 12,3 ميلليون توننا مۇناي تاسىمالدانىپ، قازاقستان بيۋدجەتىنە 160 ميلليون دوللار سالىق ءتۇستى. قازاقستانداعى ءتۇرلى قايىرىمدىلىق شارالارىنا 500 مىڭ دوللار كولەمىندە قارجى ءبولىندى. قازاقستان قىتايعا جىل سايىن ساتاتىن تابيعي گاز ەكسپورتىن 5 ميللياردتان 10 ميلليارد تەكشە مەترگە دەيىن كوتەرمەك»، - دەدى باس كونسۋل.
چجان ۆەيدىڭ ايتۋىنشا، باتىس ەۋروپا - باتىس قىتاي كولىك ءدالىزىنىڭ قۇرىلىسى تولىق اياقتالعاندا قورعاس ارقىلى تاسىمالداناتىن جۇك كولەمى جىلىنا 1 ميلليون توننادان 3,5 تونناعا دەيىن ارتادى.
«ەۋرازيا قۇرلىعىن جالعاپ تۇرعان كولىك ءدالىزىنىڭ قۇرىلىسى تولىق اياقتالعاندا قورعاس ارقىلى وتەتىن جۇك كولەمى قازىرگى جىلىنا تاسىمالدانىپ جاتقان 1 ميلليون توننادان 3,5 ميلليون تونناعا دەيىن ارتادى. جۇك تاسىمالداۋ ۋاقىتى 45 كۇننەن 10 كۇنگە دەيىن قىسقارىپ، 460 ميلليون دوللار كولەمىندە ەكونوميكاعا پايدا كەلتىرەدى. سونىڭ سەبەبىنەن، جەرگىلىكتى حالىق ءۇشىن 50 مىڭ جاڭا جۇمىس ورنى اشىلادى»، - دەپ سەندىردى چجان ۆەي.
اۆتور: الماس مۇقاش ۇلى
