قازاقستاندا 12 ءىرى زاۋىت بوي كوتەرمەك
سونىڭ ىشىندە جاڭا ءوندىرىس ورىندارى دا بار، دەپ حابارلايدى قازاقپارات ءتىلشىسى.
بانك ءتوراعاسى بولات جامىشيەۆتىڭ ايتۋىنشا، بيىلعى جوبالاردىڭ جالپى سوماسى 760 ميلليارد تەڭگەنى قۇرايدى. بۇگىندە زايم الاتىندار 312 ميلليارد تەڭگەگە تاپسىرىس بەرىپ وتىر. اتالعان جوبالار ماشينا جاساۋ، حيميا ونەركاسىبى، مۇناي حيمياسى، مەتاللۋرگيا، قۇرىلىس ماتەريالدارىن شىعارۋ جانە باسقا دا سالاداردى قامتيدى. "اعىمداعى جىلى يندۋستريالدى- يننوۆاتسيالىق دامۋ باعدارلاماسىنا كىرەتىن 12 ءىرى جوبا بويىنشا ناقتى شەشىمدەر شىعارىلادى دەپ ويلايمىز. قازىرگى كەزدە ول جوبالاردىڭ قۇجاتتارى بانكتىڭ قاراۋىندا جاتىر"، - دەيدى جامىشيەۆ.
اتالعان 12 جوبانىڭ ىشىندە ترانسفورماتورلاردى ءوندىرۋ (شىمكەنت) ، تۇرمىستىق حيميا (الماتى) ، كالتسي قوسىلعان سودانى شىعارۋ ( قىزىلوردا وبلىسى) ، مايلاۋ ماتەريالدارىن ءوندىرۋ (وڭستۇستىك قازاقستان وبلىسى) ، تەرەفتالات قىشقىلى مەن پوليەتيلەن شىعارۋ (اتىراۋ وبلىسى) ، جىلىنا 100 مىڭ توننا ساپالى ۇگىتۋ ماتەريالدارىنىڭ ءوندىرىسى (باتىس قازاقستان وبلىسى) ، كونديتەرلىك ونىمدەر (قاراعاندى) ، قانت ءوندىرىسى (سولتۇستىك قازاقستان وبلىسى) ، استىقتى تۇبەگەيلى وڭدەۋ (الماتى وبلىسى) ، ەلەكترومەحنيكالىق زاۋىت (الماتى) پەن ماي ەكستراكتسيالىق زاۋىتىنىڭ (قوستاناي وبلىسى) قۇرىلىسى بار. بۇدان بولەك، شىمكەنت قالاسىنداعى مۇناي- وڭدەۋ زاۋىتىنىڭ قايتا قۇرۋ مەن جاڭارتۋ جۇمىستارى جوسپارلانعان.
ايتا كەتەيىك، بۇگىنگى باسپا ءسوز ءماسليحاتىندا بولات جامىشيەۆ ديەۆالۆاتسياعا قاتىستى ءوز بولجامىن جاريالادى.
سونداي- اق قىزىلوردا قالاسىنداعى شىنى زاۋىتىنىڭ قۇرىلىسى جايىندا ايتىپ بەردى.
شارا سوڭىندا بانك باسشىسى وليگارحتارعا قاتىستى تىلشىلەر سۇراعىنا جاۋاپ بەردى.
اۆتور: ارمان اسقاروۆ
