قازاقستاندا جىل سايىن 12 مىڭنان استام بەرەكەسىز وتباسى تىركەۋدە تۇرادى
بۇل تۋرالى بۇگىن ورتالىق ازيا ەلدەرىنىڭ جابىق مەكەمەلەرىندەگى بالالارعا قاتىستى زورلىق- زومبىلىقتى بولدىرماۋ سيمپوزيۋمىندا قازاقستانداعى بالا قۇقىقتارى جونىندەگى ۋاكىل زاعيپا باليەۆا ءمالىم ەتتى.
«جىل سايىن ىشكى ىستەر ورگاندارىنىڭ ەسەبىندە 12 مىڭنان استام بەرەكەسىز وتباسىلار بولادى. ولاردا 17 مىڭنان 18 مىڭعا دەيىن بالا ءومىر سۇرۋدە. ولار ءىس جۇزىندە ءار كۇن سايىن وزدەرىنىڭ پروبلەماسى مول اتا- انالارىنىڭ جانىندا ءومىر ءسۇرۋ ءۇشىن كۇرەسۋدە» ، - دەدى ول.
سونىمەن قاتار ول اۋمەسەر مىنەز- قۇلىقتى بالار سانىنىڭ تومەندەمەي وتىرعاندىعىنا جانە ولاردىڭ كىشكەنتاي كەزدەرىنەن يۋۆەنالدى پوليتسيا ەسەبىندە تۇراتىندىعىنا الاڭداۋشىلىق تانىتتى.
«جىل سايىن ولاردىڭ سانى 10 مىڭ بالانى قۇرايدى. اعىمداعى جىلدىڭ ءبىرىنشى جارتىجىلدىعىندا كامەلەتتىك جاسقا تولماعاندار 1549 قۇقىق بۇزۋشىلىق جاسادى. بۇل قايتا تومەندەگەنى. ماسەلەن، 2015 -جىلدىڭ سايكەس كەزەڭىندە 2239 بۇزۋشىلىق جاسالعان ەدى. بۇعان قوسا، 179 ءجاسوسپىرىم قىلمىس جاساعانى ءۇشىن سوتتالدى. 2015 -جىلى 202 ءجاسوسپىرىم ءىستى بولعان ەدى. 53 كامەلەتتىك جاسقا تولماعان بالا تاربيەلەۋ كوللونيالارىندا وتىر. وتكەن جىلى بۇل كورسەتكىش 67 بالا بولعان» ، - دەدى ز. باليەۆا.
