تاجىكستان پارلامەنتى تۇرمەدەگى 12 مىڭ ادامعا راقىمشىلىق جاساۋدى قولدادى

تاجىكستاننىڭ تومەنگى پارلامەنتى ەل پرەزيدەنتى ەمومالي راحمون ۇسىنعان راقىمشىلىق تۋرالى زاڭ جوباسىن قابىلدادى.
راقىمشىلىققا كۇدىكتى، ايىپتى، سوتتالۋشى، جازاسىن وتەۋشى رەتىندە قىلمىستىق ءىس بويىنشا وتكەن 12 مىڭ ادام ىلىگەدى.
راقىمشىلىق اياسىندا ءۇش مىڭنان استام ادام تۇزەۋ مەكەمەسىنەن بوساتىلادى. سونداي- اق، زاڭعا سايكەس، بارلىق شىعىن سوماسىن وتەگەن جاعدايدا، الاياقتىق جاساعاندار، باسقا دا قارجى قىلمىسىنا قاتىسى بارلارعا راقىمشىلىق جاسالادى.
- وتانىن ساتۋ، تىڭشىلىق، تەرروريزم، قاتىگەزدىكپەن كىسى ءولتىرۋ سياقتى اسا اۋىر قىلمىس جاساعاندار راقىمشىلىققا ىلىكپەيدى، - دەپ مالىمدەدى تاجىكستاننىڭ باس پروكۋرورى يۋسۋف راحمون.
ونىڭ ايتۋىنشا، ءومىر بويىنا تۇرمەگە قامالعاندارعا دا جەڭىلدىك كورسەتىلمەيدى.
بۇل زاڭ جوباسى ەل تاۋەلسىزدىگىنىڭ 25 جىلدىعىنا ارنالدى. تاۋەلسىزدىك جىلدارى تاجىكستاندا راقىمشىلىق 14 رەت جاريالاندى.