بۋراباي اۋداندىق سوتى شەتەلدىك 12 ازاماتقا قاتىستى اكىمشىلىك ىستەردى قارادى
سوت انىقتاعانداي، گرۋزيا رەسپۋبليكاسىنىڭ 12 ازاماتى قازاقستان رەسپۋبليكاسىنىڭ اۋماعىنا كەلىپ، بۋراباي ءاىىب- دە ۋاقىتشا تىركەلگەن جانە كىرۋ ماقساتىن «جەكە» دەپ كورسەتكەن. سونىمەن قاتار، شەتەلدىك ازاماتتار جەرگىلىكتى اتقارۋشى ورگاننىڭ رۇقساتىنسىز قۇرىلىس وبەكتىسىندە جۇمىس ىستەگەن، وسىعان بايلانىستى «كوشىپ كەلۋشىلەردىڭ قازاقستان رەسپۋبليكاسىنا كەلۋىنىڭ جانە وندا بولۋىنىڭ» قازاقستان رەسپۋبليكاسى ۇكىمەتىنىڭ قاۋلىسىنىڭ تالاپتارىن بۇزعان، ياعني زاڭسىز جۇمىس ىستەگەن.
بۋراباي اۋداندىق سوتىنىڭ قاۋلىلارىمەن گرۋزيا رەسپۋبليكاسىنىڭ ازاماتتارى اكىمشىلىك قۇقىق بۇزۋشىلىق تۋرالى قازاقستان رەسپۋبليكاسى كودەكسىنىڭ 517-بابى 2، 5-بولىكتەرىندە كوزدەلگەن اكىمشىلىك قۇقىق بۇزۋشىلىقتاردى جاساعانى ءۇشىن كىنالى دەپ تانىلىپ، سوت ءارقايسىسىنا 7 دەن 10 تاۋلىككە دەيىن اكىمشىلىك قاماققا الۋ تۇرىندە جازا تاعايىندادى، دەپ حابارلايدى ق ر جوعارعى سوتىنىڭ باسپا ءسوز قىزمەتى.
