ماجىلىستە 12 جىلدىق ءبىلىم بەرۋ جۇيەسىنە كوشۋ ماسەلەسى تالقىلاندى
ءبىلىم جانە عىلىم ءمينيسترى ەرلان ساعاديەۆتىڭ ايتۋىنشا، قوعام اراسىندا كەڭىنەن تالقىلانىپ جاتقان اتالمىش ماسەلەنىڭ وزەكتىلىگى - ءبىلىم بەرۋ ۇدەرىسىن جاڭعىرتۋدىڭ قاجەتتىلىگىمەن نەگىزدەلەدى.
بۇدان بولەك، ءبىلىم مەن عىلىم سالاسىنىڭ باسەكەگە قابىلەتتىلىگىن ارتتىرۋ جونىندەگى مىندەتتەردى جۇزەگە اسىرۋ، ورنىقتى ەكونوميكالىق ءوسىم ءۇشىن ادامي كاپيتالدى دامىتۋ - ەڭ ءبىرىنشى كەزەكتە ورتا ءبىلىمنىڭ وڭتايلى مودەلىن تاڭداۋعا، ونى ەنگىزۋدەگى تيىمدىلىككە تىكەلەي بايلانىستى بولىپ تابىلادى. سوندىقتان دا، قازىرگى تاڭدا پەداگوگتار ورتاسىندا عانا ەمەس، جالپى قوعامدا تۇتاستاي ءبىلىم بەرۋ سالاسىنىڭ باعىتى، فورمالارى، كەزەڭدەرى، مودەلدى ەنگىزۋ مەرزىمدەرى، ونىڭ ناتيجەلىلىگىنە قاتىستى بولجامدار كەڭىنەن تالقىلانۋ ۇستىندە.
كۇن تارتىبىندەگى وزەكتى ماسەلەنى تالقىلاۋ بارىسىندا دەپۋتاتتار 12 جىلدىق ءبىلىم بەرۋدەن بولەك، ءبىلىم مازمۇنىنىڭ ساپاسىن ارتتىرۋ، مەكتەپتەردى وقۋلىقپەن ۋاقىتىلى قامتاماسىز ەتۋ سەكىلدى پروبلەمالاردى دا كوتەردى. بۇدان بولەك، تاراپتار ءۇش ءتىلدى وقىتۋ جۇيەسىن ەنگىزۋگە قاتىستى دا پىكىر الماسىپ، پەداگوگ كادرلار دايارلاۋ، ورتا ءبىلىم مەكەمەسىندەگى رەسۋرستىق قامتاماسىز ەتۋلەرگە قاتىستى سۇراقتار قوزعالدى.
دەپۋتاتتار اسىرەسە اۋىلدىق جەرلەردەگى شاعىن جيناقتالعان مەكتەپتەردىڭ وقۋ پروتسەسىن جاڭعىرتۋعا باعىتتالعان قادامدارعا نازار اۋداردى. بۇنىمەن قوسا، حالىق قالاۋلىلارى ءبىلىم جانە عىلىم مينيسترلىگى جانىنداعى قوعامدىق كەڭەستىڭ قىزمەتىنە دە كوڭىل ءبولدى. ولاردىڭ ايتۋىنشا، كەڭەس مۇشەلەرى مينيسترلىك ءۇشىن ءبىلىم رەفورماسىنداعى وزگەرىستەرگە سايكەس، قازاقستاندىق قوعامنىڭ پىكىرلەرىن ەسكەرە وتىرىپ، ۇسىنىستار ازىرلەۋى كەرەك. تالقىلاۋ ناتيجەسىندە «نۇر وتان» فراكتسياسى جانىنداعى الەۋمەتتىك كەڭەس ق ر ۇكىمەتىنە ءبىرقاتار ۇسىنىستار جولدادى.
